Sepemanjai lima taun tu, bala menyadi ba serata dunya ulih negapka pengarap diri ari program Berita JW ke disediaka ninting bulan. Kitai tentu enda sabar nganti program taun 2020. Tang ke diatu, aram kita meda pemansang ke amat ngalitka ati kenyau ari keterubah iya program tu dipandangka kena Oktober 2014.

Disediaka dalam 185 bengkah bansa jaku. Keterubah, program ninting bulan Berita JW semina disediaka dalam bansa jaku English aja. Tang kena Mei 2015, Raban ti Ngiring meri atur ngambi program tu disalin ngagai 40 bengkah bansa jaku. Dalam empat taun aja, program tu udah disalin dalam urung 185 bengkah bansa jaku.

Ngena ngagai semua orang ba serata dunya. Ketegal program tu digaga bala menyadi ke datai ari mayuh bengkah menua, nya kebuah semua video ke bisi dalam program tu manah ke semua orang ba serata dunya. Ninting bulan, ba ujung program tu, bisi mandangka sekeda eklisia tauka raban ti mit ari endur ke jauh tauka jarang ditemu orang baka ba, Etiopia, Iceland, Mongolia, Saipan, Tuvalu, enggau Uganda. Berita JW udah dipandangka ngagai 230 iti menua, nyengkaum endur ti jarang ditemu baka ba Pulau Heard enggau mayuh pulau ba McDonald di kutub selatan, ti nadai mayuh orang diau. Abis nadai, dalam sebulan, enti program ke baru udah bisi, program nya dipeda lalu didownload dalam urung 8.6 juta kali.

Mayuh video sereta mayuh batang ajar. Mayuh bengkah video ke disediaka dalam program tu, baka cheramah, interbiu, utai ke nyadi, berita, sereta lakun. Enti semua video nya dijantil magang, program nya engka ulih dipeda pengelama 60 jam. Pengudah lagu asal ba Berita JW keterubah dikeluarka, iya nya Tu Jalai Pengidup ti Mai Pengelantang, selalu bisi lagu ti baru ninting bulan ba program Berita JW. Semua lagu tu udah disalin ngagai 368 bengkah bansa jaku.

Pengacara. Keterubah, semina Raban ti Ngiring nyadi pengacara program tu. Tang nyau kelama, penulung Raban ti Ngiring mega sama begulai enggau sida tauka semina sida seiku aja nyadi pengacara sepemanjai program tu. Kesemua sida, bisi 29 iku menyadi lelaki kitai ke kala nyadi pengacara tauka nyadi penulung pengacara.

Beterima kasih. Seiku menyadi lelaki ari Amerika Serikat, ke mayuh napi pemerinsa ketegal stroke, amat beterima kasihka lagu asal ti bisi dalam program tu. Iya madahka, “Semua lagu tu amat manah. Aku ulih berunding enggau manah agi, lalu nulung aku napi pemerinsa ke ditapi aku diatu. Aku enda nyangka, lagu tu ulih nulung aku ngemansangka pengarap. Amat beterima kasihka semua lagu tu!”

Siti ruang bilik ba Amerika Serikat amat tusah ati pengudah anak sida ke agi mit mati ketegal kanser. Pengudah meda program Berita JW bulan November 2016, sida nulis, “Ai mata kami bekeberai maya kami meda video musik Udah ba Mua Mata. Kami ngambarka diri udah ba Paradais baka orang tuai ba video nya. Kekadang, ati aku balat telih nyentukka aku deka nyerahka diri aja. Tang Jehovah seruran nulung aku. Iya madahka kami, Iya amat nemu utai ke diasaika kami, lalu deka nulung kami napi penusah tu. Semua video nya amat saut ngagai semua sampi kami.”

Sepasang laki bini ba Ukraine mega amat beterima kasihka program tu. Sida madah, “Ketegal bisi program Berita JW, kami ngasaika diri semak agi enggau Raban ti Ngiring. Sida udah baka ruang bilik kami empu!”

Kitai amat beterima kasih laban Jehovah nyediaka utai ti amat diguna kitai kemayaharitu. Tu nulung semua penyembah Iya ba serata dunya ngasaika diri bisi ruang bilik ti amat besai.—1 Peter 2:17.