Sekumbang bisi sekat ketegal COVID-19, Saksi-Saksi Jehovah di serata dunya agi terus ngeluarka salin Bup Kudus ke baru. Kena 28 Jun 2020, Bup Kudus Salin Dunya Baru dikeluarka dalam bansa jaku Swati, Tsonga, Zulu, enggau Chitonga. Pia mega, Bup Kudus Salin Dunya Baru Jaku Gerika dikeluarka dalam jaku Belize Kriol enggau Totonac. Taja pan bala menyadi ke nerima salin Bup Kudus ke baru tu enda ulih begempuru begulai ketegal penekul bekaul enggau COVID-19, tang sida agi balat amat gagit ati nerima pail bansa elektronik. Semua Bup Kudus tu dikeluarka ngena cheramah ti udah dirikut dulu lalu dipandangka terus nengah online tauka nengah video call.

Menyadi Geoffrey Jackson, seiku ari Raban ti Ngiring, ngeluarka pail bansa elektronik Bup Kudus Salin Dunya Baru ba jaku Swati, lalu pia mega Bup Kudus Salin Dunya Baru ke diaduka baru dalam jaku Tsonga enggau jaku Zulu (peda gambar ba atas). Bala penginjil ari menua Afrika Selatan enggau Eswatini sama bela meda gempuru ti spesial tu.

Di kandang Pampang Opis Afrika Selatan, kira-kira 18.5 juta iku orang ngena bansa jaku Swati, Tsonga, enggau Zulu. Tu nyengkaum lebih ari 38,000 iku penginjil.

Menyadi Augustine Semo, seiku ari Komiti Pampang Opis Malawi ngeluarka Bup Kudus Salin Dunya Baru dalam bansa jaku Chitonga (Malawi).

Bala penyalin bekereja pengelama lebih dua taun kena nembuka salin penuh Bup Kudus tu. Seiku penyalin nerangka: “Bisi tiga bengkah bansa jaku Chitonga. Orang ari menua siti ngena jaku ti enda sebaka enggau orang ari menua bukai. Kami milih leka jaku enggau bejimat ngambika jaku nya ulih dimereti orang mayuh. Kelimpah ari nya, kami nyimpan sekeda nota kaki kena nerangka sesiti leka jaku ti engka enda entu ditemu pemacha.”

Seiku penyalin ke bukai madah: “Salin Bup Kudus ti baru tu senang dikena bala menyadi lebuh nginjil sereta begempuru. Ketegal jaku ti dikena terang, nya senang dibacha sereta dimeretika.”

Menyadi Joshua Kilgore ari Komiti Pampang Opis Amerika Tengah ngeluarka Bup Kudus Salin Dunya Baru Jaku Gerika dalam bansa jaku Belize Kriol. Lebih ari 1,300 iku orang ningaka program nya.

Enam iku penyalin bekereja pengelama 16 bulan ngambika nembuka projek tu. Seiku ari sida nerangka pasal penguntung ari salin Bup Kudus tu. Ku iya: “Bala menyadi kitai baru bisi salin Bup Kudus ti tau dikearapka. Tu sempama lampu tenggau ti manchar lalu nulung sida mereti agi.”

Seiku penyalin ke bukai madah, “Indah maya napi penanggul COVID-19 tu, bala menyadi kitai ke ngena jaku Belize Kriol ulih macha Bup Kudus dalam bansa jaku sida empu. Tu ulih merindang sereta ngelantangka ati sida, lalu nulung sida betan napi penusah ti deka datai.”

Ba menua Belize, bisi 867 iku penginjil dalam 19 iti eklisia jaku Belize Kriol. Kelimpah ari nya, bisi mega 58 iku penginjil ti ngena bansa jaku Belize Kriol di Amerika Serikat.

Menyadi Jesse Pérez, seiku ari Komiti Pampang Opis Amerika Tengah, ngeluarka Bup Kudus Salin Dunya Baru Jaku Gerika dalam bansa jaku Totonac. Dalam kandang Pampang Opi snya, bisi 50 iti eklisia jaku Totonac. Kira-kira 2,200 iku orang ningaka program ti spesial tu.

Tim penyalin nembuka projek tu dalam tiga taun lebih. Salin Bup Kudus tu amat beguna kena nusui Berita Manah ngagai lebih 250,000 iku orang ke ngena jaku Totonac ba Mexico.

Seiku penyalin nerangka, enda baka salin Bup Kudus jaku Totonac ke bukai, Salin Dunya Baru tu senang dimereti, laban iya ngena “jaku ke dikena kami besehari-hari. Diatu, kami senang agi nerangka topik Bup Kudus ngagai orang ke diau ba komuniti kami.”

Seiku ari penyalin ke gawa ba projek tu madahka, “Udah lama bala menyadi kitai dekaka siti salin Bup Kudus baka tu. Naka ke diatu, sekeda penginjil kediri empu nyalin ayat Bup Kudus ari jaku Sepanyol ngagai jaku Totonac ngambika nyediaka cheramah kena gempuru tengan minggu. Tang, sida enda ibuh ngaga tu agi lebuh sida deka madahka ayat Bup Kudus ari begian Sempekat Baru.”

Salin tu ngundan mayuh nota kaki ti madahka chara bukai sesiti leka jaku ulih disalin. Laban bisi beberapa bengkah bansa jaku Totonac, penerang tu nentuka semua orang ulih mereti ayat Bup Kudus, enda ngira nama bengkah jaku Totonac ke dikena sida.

Kitai gaga ati ke bala menyadi kitai ke baru nerima salin Bup Kudus dalam bansa jaku sida empu. Kitai andalka, pemeri tu deka ngeringka pengarap sida seraya sida ngena “pedang ti bemata dua” ba pengawa nginjil enggau belajarka Bup Kudus kediri empu.—Hebrew 4:12.