Kena 25 April, 2020, Menyadi Mark Sanderson, seiku ari Raban ti Ngiring, madahka pasal Bup Kudus Salin Dunya Baru ti dikeluarka dalam bansa jaku Croatia enggau Serbia nengah video ti udah dulu dirikut. Bisi dua chara jaku Serbia ditulis, ngena urup Roman sereta urup Cyrillic, lalu edisi Bup Kudus tu dikeluarka dalam kedua-dua urup nya tadi.

Nitihka atur ari perintah menua, ketegal penyakit berampit, nadai eklisia begempuru enggau pangan diri ba Bosnia sereta Herzegovina, Croatia, Montenegro pia mega ba Serbia. Tang, siti gempuru ti spesial diatur ngena video call, lalu 12,705 iku orang begulai ningaka program ti spesial tu.

Seiku menyadi lelaki ke bisi ningaka program nya madahka, salin Bup Kudus ti baru diaduka tu sempama “batu ti berega,” lalu iya nerangka, nengah Bup Kudus tu, iya berasai baka ke “Jehovah empu bejaku ngagai aku.” Seiku tuai gempuru madah: “Majak aku macha salin Bup Kudus ti baru diaduka dalam bansa jaku aku empu, majak aku ngasaika pengerindu sereta pengibuh Jehovah ngagai aku. Pia mega, lebuh aku datai meransang menyadi bukai ba eklisia, aku senang agi deka nulung sida nemu, Jehovah endang sayauka sida sereta ngumbai sida berega.”

Pengawa nyalin Bup Kudus dalam kedua-dua bansa jaku tu berengkah kena ujung taun 1996. Kurang tiga taun pengudah nya, kena Julai 1999, Bup Kudus Salin Dunya Baru Dalam Jaku Gerika dikeluarka dalam bansa jaku Croatia enggau Serbia. Tujuh taun udah nya, kena taun 2006, Bup Kudus Salin Dunya Baru ti penuh dikeluarka dalam kedua-dua bansa jaku.

Edisi baru Bup Kudus Salin Dunya Baru dalam bansa jaku Croatia enggau Serbia, ti disalin enggau betul sereta senang dimereti, endang deka nulung semua pemacha nemu, ‘jaku Petara idup.’—Hebrew 4:12.