Tu meh kali kedua dalam dua minggu aja, Saksi-Saksi Jehovah ngeluarka salin Bup Kudus dalam 6 bansa jaku. Kena 4 Julai 2020, Bup Kudus Salin Dunya Baru dikeluarka dalam bansa jaku Bislama sereta Oromo. Ba hari siti, kena 5 Julai, Bup Kudus Salin Dunya Baru dikeluarka dalam bansa jaku Latvian sereta Marathi, lalu pia mega Bup Kudus Salin Dunya Baru Jaku Gerika dikeluarka dalam bansa jaku Benggali enggau Karen (S’gaw). Semua salin Bup Kudus nya dikeluarka ngena pail bansa elektronik. Bala penginjil ti meda program video ti spesial balat amat gagit ati nerima pemeri tu ari Jehovah.

Bup Kudus Salin Dunya Baru ke diaduka baru, dikeluarka Menyadi Mark Sleger, seiku ari Komiti Pampang Opis Fiji. Bala penginjil ba Vanuatu ningaka program nya dalam jaku Bislama, lalu ba maya ti sama, program nya disalin ngagai jaku bengal-bisu Bislama.

Projek nyalin Bup Kudus nya ditembuka dua iti tim penyalin, dalam timpuh tiga taun. Seiku ari penyalin nya madahka: “Bala menyadi tentu rindu amat macha salin ti baru diaduka tu. Jaku nya senang agi dibacha, sereta disepil nitihka chara nyepil kemayaharitu. Tu deka nulung kami semua meretika pemendar enggau dalam agi.”

Tentu salin Bup Kudus ke diaduka baru tu deka nulung lebih ari 700 iku penginjil ti ngena bansa jaku Bislama, lebuh sida belajarka Bup Kudus kediri empu sereta nginjil.

Menyadi Delroy Williamson, seiku ari Komiti Pampang Opis Etiopia ngeluarka Bup Kudus Salin Dunya Baru dalam bansa jaku Oromo. Bisi 12,548 iku menyadi ke ninga enggau meda program nya, nyengkaum sida ke 2,000 iku penginjil ti ngena bansa jaku Oromo.

Ketegal penanggul ba teknologi, Raban ti Ngiring ngemendarka program ke udah dirikut dulu nya, dipandangka ba TV. Bala penginjil pan ulih ningaka program nya nengah talipun.

Lima iku penyalin nyalin Bup Kudus nya, pengelama lima taun. Salin Bup Kudus tu endang beguna bendar ke bala menyadi kitai ke nginjil ngagai mayuh amat orang ke ngena bansa jaku Oromo.

Pengudah projek tu dipejalaika enggau bagas pengelama 12 taun, baru meh Bup Kudus Salin Dunya Baru dikeluarka dalam bansa jaku Latvian. Semua eklisia jaku Lativan enggau eklisia jaku Russian ba menua Latvia, sama bela meda program nya.

Menyadi Jouni Palmu, seiku ari Komiti Pampang Opis Finland, ngenataika cheramah ngeluarka salin Bup Kudus tu. Ku iya: “Kami balat gaga ati ngeluarka salin Bup Kudus ti senang dibacha tu. Kami arapka salin tu deka nulung bala menyadi rindu agi belajarka sereta belematika Jaku Petara.”

Seiku ari tim penyalin nerangka pasal utai baru ba Bup Kudus tu, ti ulih dikena maya ngaga pansik. Ku iya: “Salin Bup Kudus ti baru tu senang amat dikena kitai, lalu nulung kitai mansik enggau dalam agi, sereta belematika pesan Bup Kudus.”

Siti program ti spesial diatur ngagai semua eklisa jaku Marathi di India. Ba maya program nya, Menyadi Puneet Aggarwal ari Komiti Pampang Opis India ngeluarka Bup Kudus Salin Dunya Baru.

Enam iku penyalin gawa ba projek tu, pengelama tiga taun. Seiku ari tim penyalin nya madah: “Salin tu deka nulung bala apai indai sereta pengajar Bup Kudus, ngambika sida ulih ngajar pemendar ari Bup Kudus.”

Seiku penyalin ke bukai madah: “Dalam salin Bup Kudus tu, nama Petara, Jehovah, ditepuka baru ba endur ti patut, nitihka Bup Kudus asal. Tu amat ngagaka ati. Orang ke macha salin tu ulih meda nama Jehovah dalam nyau ka tiap iti lambar Bup Kudus. Nyadi, nama Jehovah deka dipuji enggau dikemesaika, laban tu meh ke patut.”

Ba tengah India, lebih ari 83 juta iku orang ngena bansa jaku Marathi.

Menyadi Ashok Patel, seiku ari Komiti Pampang Opis India ngeluarka Bup Kudus Jaku Gerika dalam bansa jaku Benggali. Lebih ari 1,200 iku penginjil ari India enggau Bangladesh ningaka program tu.

Lebih ari 265 juta iku orang ngena bansa jaku Benggali. Lalu nya meh bansa jaku ke-7 ti pemadu mayuh dikena ba serata dunya. Ngambika ulih ngasilka siti salin ti nyamai dibacha orang mayuh, siti tim penyalin ditumbuhka nyengkaum bala menyadi ari beberapa endur ba India sereta Bangladesh. Sida begulai gawa ba projek tu pengelama tiga taun.

Dalam cheramah iya, Menyadi Ashok nerangka: “Jaku Benggali nya siti ari bansa jaku menua India ke terubah iya nyalin Bup Kudus. Kena taun 1801, Bup Kudus Jaku Gerika dikeluarka dalam jaku Benggali. Utai ti manah pasal salin nya, nama Petara iya nya Jehovah, bisi diayanka. Tang, ba salin bukai kemayaharitu, nama Petara udah diganti enggau gelar baka ‘Tuhan.’ Orang begunaka salin ti betul, sereta senang dimereti. Bup Kudus Salin Dunya Baru Jaku Gerika meh ke salin ti diguna orang mayuh.”

Seiku ari tim penyalin madahka: “Salin Bup Kudus tu nyadika bukti Jehovah sayauka orang ari semua bansa enggau bansa jaku, lalu mai semua orang belajar pasal Iya sereta Anak Iya, Jesus Kristus.”

Menyadi Hiroshi Aoki, seiku ari Komiti Pampang Opis Myanmar ngeluarka Bup Kudus Jaku Gerika dalam bansa jaku Karen (S’gaw). Bisi 510 iku orang ari enam iti eklisia sereta 4 iti raban ningaka program nya.

Projek tu tembu dalam setaun lebih. Seiku ari penyalin ke gawa ba projek tu madahka: “Bala menyadi sereta orang ba luar eklisia, sama deka rindu macha Bup Kudus tu, laban nama Jehovah ditepuka baru. Pia mega, ketegal salin tu ngena jaku moden, iya pan senang dibacha sereta mudah dimereti. Kami amat beterima kasih ngagai Jehovah ke pemeri ti chukup manah tu. Salin Bup Kudus tu deka nulung kami nyemakka diri ngagai Petara, laban ulih macha Bup Kudus dalam bansa jaku kami empu.”

Seiku penyalin ke bukai madah: “Salin Dunya Baru ditulis enggau jaku ke dikena kami besehari-hari. Nyadi, lebuh orang macha cherita dalam Bup Kudus, sida ulih mereti agi asai ati nembiak Bup Kudus, ulih ngambarka utai ke nyadi ba sida, lalu neladan pengarap sida.”

Kitai pan gaga ati enggau bala menyadi kitai ke baru nerima semua salin Bup Kudus tu. Kitai nemu, salin baru tu ulih nulung bala penginjil ti ngena bansa jaku tu, ngerapatka kaul sida enggau Jehovah, sereta bekunsika pemendar enggau orang bukai.—John 17:17.