Dalam sejarah, Saksi-Saksi Jehovah nadai kala bejalaika pengawa meri tulung pengerusak alam sebesai baka ke dikereja dalam taun nginjil 2020. Pengawa meri bantu nya pan agi diteruska di serata dunya. Dalam setaun ti udah, 950 iti Komiti Tulung Pengerusak Alam (DRC) ditumbuhka. Tu endang patut, laban kelimpah ari napi penyakit berampit COVID-19, bala menyadi kitai di serata dunya pan dituntung mayuh bengkah pengerusak alam enggau penyarut ke bukai. Siti penanggul ke ditapi bala menyadi ke gawa ba DRC, baka ni chara ngenataika bantu ke diguna ngagai bala menyadi ke ditinggang pengerusak alam, tang ba maya ti sama, nitihka atur ngambika nyeliahka diri ari penyakit berampit COVID-19. Bala menyadi ke udah meri bantu tu madah, pengarap sida dikeringka ulih pengawa ke dikereja sida dalam setaun ti udah. Peratika sekeda penusah ke ninggang bala menyadi kitai:

Ba taun nginjil 2020, bala menyadi kitai napi 126 iti kabut ti balat. Reti nya, 11.5 peratus mayuh agi kabut ke balat nyadi enti dibandingka enggau taun nginjil 2019. Mayuh ari kabut tu ngujungka penusah ampuh bah tauka tanah tusur.

Ambika chunto, mayuh ribut taufan mangka Pilipina, lalu ngujungka mayuh penginjil dipindahka ari rumah sida.

Ujan bangat di Nigeria pan ngerusak umai bala menyadi kitai.

Dalam taun tu, musin ujan ba Korea Selatan lama agi ari biasa, lalu mai mayuh pengerusak.

Ba mayuh menua, utan angus mai mayuh pengerusak. Sekeda ari penusah angus tu dikumbai pemadu besai ke kala nyadi dalam sejarah.

Sekeda ari nyawa menyadi kitai bebadi ketegal penusah tu. Penusah angus nya chukup besai nyentukka lebih sejuta ikar tanah udah diempa api nya.

Tu meh utai ke nyadi ba Amerika Serikat.

Penusah angus tu meri empas ngagai menyadi kitai ba Australia mega.

Pengudah penusah baka tu nyadi, gerempung kitai meri iring pasal nyaga pengelikun, ngambika sida ke meri bantu sereta sida ke nerima bantu nya, ulih ngelindung diri ari penyakit berampit.

Menyadi Han Chan-hee, gawa ba DRC di Korea Selatan. Iya nerangka chara sida nyaga pengelikun bala menyadi: “Ninting pagi kami ngechek suhu semua orang ke datai nulung, sereta nyaga takah entara pangan diri. Kami natak penyampau sukarela ke ulih datai sereta enda makai begulai lebuh ngetu gawa. Nambahka nya, bala menyadi nuchi perengka ke dikena sida sebedau berengkah sereta pengudah abis kereja.”

Sekeda ari menyadi kitai dipindahka ari rumah sida ketegal pengerusak alam ke nyadi ba endur sida. Lebuh utan angus balat nyadi ba Pesisir Barat Amerika Serikat, Menyadi Chris Shirah nulung ba DRC nya. Iya nerangka: “Maya kami ngaga atur ke bala menyadi diau ba rumah menyadi bukai, kami nitihka sekat ngambika ulih nentuka nadai kelalu mayuh menyadi disegulaika ba dalam sebuah rumah, enggai ke COVID-19 berampit dia.”

Ba sekeda menua, penyampau orang ke ulih datai ke siti endur meri tulung ditatak ketegal lockdown. Mayuh orang enda dikemendarka bejalai ari endur siti ke endur siti. Menyadi Philips Akinduro gawa ba DRC di Nigeria. Iya nerangka: “Siti penanggul ti besai ba kami iya nya, perintah menua udah nagang orang ari bejalai jauh. Enda senang kami ngiga menyadi ke diau semak ti ulih nulung ba pengawa meri bantu.”

Menyadi Kim Joon-hyeong, ke gawa enggau DRC ba Korea Selatan bisi madahka pasal semengat sida ke nyadi sukarela. Ku iya: “Semua kami ngereja pengawa tu ketegal pengerindu ke Petara sereta bala menyadi. Nya kebuah, lebuh kami meri bantu ngagai sida, kami nyaga pengelikun pangan diri laban sayauka nyawa tiap iku orang. Nyadi, taja pan kami patut lebih bejimat ari biasa, kami tetap mengkang gaga ati ngereja semua pengawa kami.”

Ketegal udah mujur ngenataika bantu ngagai menyadi ke ditinggang penusah, taja pan napi penanggul bukai ketegal penyakit COVID-19, sida ke bisi ungkup ba pengawa tu madahka diri andal agi ngagai Jehovah ari ke suba.

Ambika chunto, Menyadi Han irau, kati amat bisi chukup sukarela, ngambika belabuh meri bantu kurang 24 jam pengudah penusah nyadi? Iya ngenang: “Dalam beberapa jam aja, aku udah sedar, aku endang nadai kebuah irauka tu. Beratus iku menyadi ari serata menua kami udah madahka diri sanggup deka nulung. Indah, kelalu mayuh menyadi deka nulung, nyentukka kami patut nulak sekeda ari sida.” Iya nampung: “Aku endang udah ngasaika Jehovah bisi enggau kami, lalu nya amat negu ati aku.”

Baka nya mega, Menyadi Brad Brenner ari menua Honduras ke meri bantu pengudah kabut mangka menua nya. Ku iya nerangka: “Taja pan napi mayuh stress, menyadi kitai ke dipindah ari rumah sida udah bisi endur diau, nerima pemakai, sereta jaku peransang ari Bup Kudus ke diguna sida. Aku empu udah meda, taja pan bala menyadi ditu napi dua iti ribut balat sereta penyakit berampit, tang nadai utai ulih ngachau pengerindu enggau penyerakup ba entara gerempung kitai.”

Menyadi Alquin Dayag, ke gawa ba DRC di Pilipina madah: “Peneleba tu ngasuh aku andal agi, Jehovah endang meri kuasa ti besai, iya nya pengering ti ngelui penau kitai sereta penemu-dalam ngambika nembuka pengawa kitai.”—2 Korint 4:7.

Kitai beterima kasih ngagai bala menyadi Kristian ke nulung bejalaika pengawa tu, nyengkaum sida ke gawa ba pampang opis enggau DRC. Pemagas sida ke gawa, sereta pengerah jari sida ke meri duit pemeri endang udah nulung menyadi kitai ke ditinggang penusah dalam taun ti besejarah tu.—1 Tesalonika 1:3.