Kena 13 Julai 2021, European Court of Human Rights (ECHR) meri pemutus ke bepiak enggau Menyadi Rostom Aslanian dalam siti kes ke bekaul enggau menua Moldova enggau Rusia. Menyadi Rostom Aslanian dijil di Transnistria (Republik Pridnestrovskaia Moldavskaia) laban iya enggai nyadi soldadu ketegal pengarap iya. Iya ngumbai ukum jil tu salah. Pemenang tu nyadika pemutus ti ngetanka hak bibas milih pengarap di Transnistria.

Taja pan Transnistria nya sebagi ari menua Moldova, tang menua Rusia bisi hak ngemataka sekeda atur pasal pengelikun ba menua nya. Moldova enggau Rusia sama besetuju enggau European Convention on Human Rights lalu enda tau enda bebasaka pemutus mensia kediri empu.

Kena taun 2010, Menyadi Aslanian dikangau nyadi soldadu, tang iya minta pengawa ti bukai ketegal utai ke dipechayaka iya ari Bup Kudus. Kena 29 Mac 2011, utai ke dipinta iya ditulak lalu iya dikumbai besalah sereta diukum jil pengelama setaun. Menyadi Aslanian nembuka ukum jil, tang nyau kelama kes iya dibai ngagai European Court of Human Rights.

Lebuh ECHR nya bepecharaka kes tu sida mansik pemutus kot ke sebedau tu ti nunjukka Menyadi Aslanian endang enda patut dijil laban iya enggai nyadi soldadu ketegal pengarap iya. Kot nya bisi mansik lalu tetemuka menua Rusia bisi kuasa senentang soldadu, ekonomi, sereta politik di Transnistria. Nya alai, ukai Moldova tang Rusia ke ditemu besalah lalu patut betanggungjawapka kes tu. ECHR madahka piak bekuasa Rusia udah ngelanggar hak bibas milih pengarap Menyadi Aslanian lebuh meri ukum jil pengelama setaun ngagai iya ketegal iya enggai nyadi soldadu. Lalu perintah Rusia patut mayar ganti rugi ngagai iya ketegal dijil setaun.

Kitai gaga ati ke pemutus tu laban ulih ngelindung bala menyadi kitai di Transnistria. Kitai mega dikingatka Jehovah deka nunjukka pengerindu sereta nyaga nembiak Iya lebuh diuji.—Masmur 18:25.