Kena Hari Minggu 26 Julai 1931, Menyadi Joseph F. Rutherford, ke nyadi presiden Watch Tower Bible and Tract Society, bejaku enggau lebih 15,000 iku orang ba konvensyen di Columbus, Ohio, Amerika Serikat. Sebagi ari program nya dimainka ba lebih 450 stesen radio ba serata dunya. Tu meh keterubah iya ngemayuh nya stesen radio ngemainka program ti sama di serata dunya. Menyadi Rutherford macha siti pemutus ngagai orang mayuh. Tajuk dokumen nya “Nama Baru.” Iya bisi nulis: “Kenyau ari diatu, kami ingin deka dikumbai sereta dikangau Saksi-Saksi Jehovah.” (Peda kutak “ Pemutus.”) Semua orang besetuju sereta nyebut “Au!” enggau nyawa ti inggar lalu betempik jari.

Cherita pengidup Menyadi Arthur Worsley dikeluarka ba taun 1986. Ku iya madah: “Aku enda ulih lupa pengingat orang ke nyebut “Au!” sereta orang ke betempik jari engau inggar ba maya nya.”

Sekeda menyadi ba menua bukai ninga pemutus nya dibacha lebuh nya dimainka ba radio. Menyadi Ernest enggau Naomi Barber ba Australia ngenang: “Lebuh kami ninga menyadi ba Amerika berengkah betempik jari bala menyadi ba Melbourne mega berengkah bediri lalu betempik jari.” Seraban mit orang ba Jepun, nyengkaum Menyadi Matsue Ishii, mega ninga pasal pemutus nya. Iya nulis: “Kami berengkah manjung gaga ati sama enggau menyadi ba Amerika.”

Bisi orang madahka, ba Columbus, Ohio, sekeda bisnes masang tanda ti ngelaluka bala Nembiak Bup Kudus Entarabansa. Tang udah nya, tanda nya diubah nyadi “Selamat Datai, Saksi-Saksi Jehovah.” The Messenger nya surat khabar ke dikeluarka Watch Tower Bible and Tract Society ke madahka pasal berita konvensyen kitai. Edisi kena 28 Julai 1931 nya meh keterubah iya nama Saksi-Saksi Jehovah dichelak.

Sepengudah konvensyen nya, bala menyadi kitai ngaga kimpin pengawa nginjil ngagai mayuh bansa jaku. Sida nyadung bup mit The Kingdom, the Hope of the World ti nyengkaum penerang pasal nama baru nya. Dalam dua bulan setengah, lebih 5 juta iti bup mit disadung. Mayuh tuai pengarap, pegawai perintah enggau orang ke bedagang nerima siti salin.

Menyadi Martin Poetzinger nulis, ba maya nya, “Ba tiap iti pintu, orang ke ditemu kami amat tekenyit lebuh kami ngena jaku tu: ‘Aku datai saritu laban aku seiku ari Saksi-Saksi Jehovah.’ Mayuh orang ngiling pala lalu nanya ‘Endaka kita dikumbai nembiak Bup Kudus?’” (Peda kutak “ Kad Nama ke Madahka pasal Nama Jehovah.”) Menyadi Martin madah, betaun-taun udah nya, “Mayuh utai udah berubah. Sebedau aku madahka nama-nama utai, orang deka nyebut, ‘Nuan tentu seiku ari Saksi-Saksi Jehovah.’”

Menyadi A. H. Macmillan ke mega datai ngagai konvensyen ba 1931 nerangka nama kebuah nama nya amat engkeman. Ku iya madah: “Ba runding aku, tu idea ti manah, laban nama nya nerangka pengawa enggau tuju kitai. Sebedau tu kami dikangau Nembiak Bup Kudus. Nama kebuah? Laban kami sigi pemelajar Bup Kudus ba maya nya. Lebuh orang ba serata dunya berengkah belajarka Bup Kudus enggau kami, kami dikumbai “Nembiak Bup Kudus Entarabansa.” Tang, diatu kami nya saksi ngagai Petara kami Jehovah, lalu nama nya madahka sapa kami lalu nama utai ke digaga kami.”

Kemayaharitu, bejuta-juta iku orang ba serata dunya gaga ati dikumbai Saksi-Saksi Jehovah.—Isaiah 43:10-12.