Empai lama ti udah, Saksi-Saksi Jehovah ngeluarka siti laman web baru, iya nya JW Stream-Studio. Laman web tu digaga ngambika tiap iti pelilih menua ulih meda gempuru besai sida empu enggau tuai ti ngabas sida empu. Kena 6 ngagai 7 Mac 2021, 340 gempuru besai dipejalaika nengah laman web ti baru tu di serata dunya. Lebih ari 500,000 iku orang meda program gempuru besai enggau chara tu.

Enda lama pengudah penyakit COVID-19 berengkah berampit di serata dunya, Komiti Ngajar ari Raban ti Ngiring mesanka Begian Indu Opis Berita JW nempa siti laman web baru ti ulih dikena tuai ti ngabas di serata dunya kena ngenataika program gempuru besai ngagai pelilih menua ke dikemataka sida. Juluk ati sida nya, ngambika beribu iku orang ulih meda program ke dipandangka terus ba maya ti sama.

Begian Berita JW nya milih beberapa iku menyadi lelaki enggau menyadi indu gawa ba projek spesial tu. Sekumbang projek tu, raban mit nya patut mutarka sekeda penanggul ke nekul pengawa sida.

Ambika chunto, laman web nya patut mudah dikena, laban ukai semua menyadi ke deka ngena laman web nya amat landik ngena komputer. Nambahka nya, sida patut ngaga laman web nya ngambika iya agi ulih dikena indah maya line Internet enda kuat. Kelimpah ari nya, Begian Berita JW pan bekerejasama enggau Opis Komputer kena ngulihka mayuh agi server ti nampung laman web nya. Tu beguna bendar, laban deka bisi beribu iku orang ngena laman web nya ba maya ti sama.

Alex Hernandez ke gawa ba Begian Berita JW madah: “Lebuh kami diasuh nempa laman web tu, ti deka mandangka beratus gempuru besai ba maya ti sama, kami gagit ati. Tang kami pan nemu, kami deka napi mayuh penanggul. Tim kami mit aja, lalu ba mayuh ari kami, tu meh kali keterubah kami nempa laman web baru ti ngena teknologi video konferen.”

Kena bulan Mei 2020, tim nya ngasilka pelan ti keterubah pasal JW Stream-Studio. Lima bulan pengudah nya, kena Oktober 2020, Begian Berita JW belabuh nguji laman web ke baru tembu nya enggau tulung bala tuai ti ngabas ba enam iti menua. Enggau tu, sida ulih meda nama penanggul ke nyadi lebuh laman web nya dikena, lalu ngaga ubah ti patut kena mutarka penanggul nya sebedau laman web nya dikena orang mayuh. Kena Mac 2021 lebuh laman web nya keterubah iya dikena di serata dunya, bisi 17 iku menyadi lelaki enggau menyadi indu ti bepeneleba ke nulung menyadi ba menua bukai enti napi penanggul lebuh ngena laman web nya.

Alex nampung: “Tiap kali kami napi siti penanggul, kami ngetu dulu lalu besampi. Lebuh kami tetemuka chara mutarka penanggul nya, kami pechaya Jehovah udah nulung kami.”

Mayuh bala menyadi udah meri terima kasih ke laman web baru tu.

Ku Menyadi Jairo Espinosa ba Colombia madah: “Kami ngasaika program gempuru besai ke dikenataika nengah JW Stream-Studio negapka penyerakup kami sereta ngasuh kami berasai semak enggau bala menyadi. Nambahka nya, laban kami nemu program nya benung dikenataika bala menyadi, ukai dirikut dulu lalu dipasang aja ba komputer kami, kami senang agi mengkang fokus maya ningaka program nya. Mimit pan kami enggai tinggal ari program nya. Tu endang siti berekat besai!”

Menyadi Magaly Reymundo ari Amerika Serikat nerangka “Aku nemu, program nya sama aja nemuka nya dirikut dulu, tauka dipandangka terus. Tang aku amat rindu meda mua bala menyadi ke dikelala aku ke benung ngenataika cheramah.”

Udah bisi lebih ari 800 gempuru besai dikenataika nengah JW Stream-Studio. Kitai beterima kasih ke Jehovah ti udah nyediaka siti da agi perengka ti ulih negapka pengarap kitai sereta nyerakupka kitai enggau bala menyadi Kristian.—Masmur 133:1.