Ketegal penyakit coronavirus ke balat ngerampit di serata dunya, mayuh ari bala menyadi kitai patut ngubah chara sida nginjil enggau begempuru. Kesuah iya, Palan Gempuru kitai enda tau dikena, lalu sementara tu, gempuru kitai dipejalaika nengah applikasi video call. Ketegal ubah tu, mayuh menyadi ngubah chara sida meri duit pemeri kena nyukung pengawa Kristian kitai di serata dunya. Diatu, sida meri duit nengah online.

Dalam lebih 112 buah menua, Saksi-Saksi Jehovah ulih meri duit pemeri nengah online ba donate.pr418.com, ngena kad debit tauka kad kredit.

Ketegal mayuh penginjil nadai agi ulih nepuka duit pemeri sida dalam kutak pemeri ba Palan Gempuru, sekeda udah mutuska meri pemeri enggau automatik ngena penyampau ti tetap nengah donate.pr418.com. Menyadi Susan Cohen nya seiku penginjil ari Amerika Serikat ke beumur 74 taun, lalu iya pan ngena atur tu. Ku iya madah: “Nya amat senang digaga. Enti aku ulih ngaga nya, semua orang ulih. Laban aku agi ulih meri duit pemeri kena nyukung pengawa nginjil di serata dunya, nya amat ngagaka ati aku.”

Menyadi Eduardo Paiva ari Brazil kala ngumbai, meri duit pemeri nengah donate.pr418.com nya semina siti agi chara ke engka ngam agi ba sekeda orang. Iya madah: “Baru-baru tu, aku nemu, tu meh chara ti pemadu manah ke kitai terus nyukung pengawa Kristian kitai di serata dunya ba maya napi penusah. Indah ba hari ti penudi tu, nengah chara tu, kitai agi ulih terus ngayanka pengerindu enggau terima kasih.”

Meyadi Gajus Glockentin ke ngemataka begian Opis Nyaga Duit ba Indu Opis Saksi-Saksi Jehovah di Warwick, New York, madahka: “Lebuh meda pengeran bala menyadi kitai deka meri duit pemeri kena nyukung pengawa kitai, nya amat meransang. Kami amat beterima kasih ke semua duit pemeri nya. Kami seruran ngiga chara ulih ngurangka belanja dalam gerempung kitai, ngambika duit ke udah diberi nya, dikena enggau chara ti pemadu manah. Taja pan penyampau ke ulih diberi sekeda menyadi udah dikurangka, tang pengeran sereta pengingin sida deka nyukung gerempung Jehovah sigi enda dikurangka.”—2 Korint 9:7.