Kena 31 Ogos nyentukka 26 Oktober 2019, bala menyadi ke datai ari 19 buah menua datai ngagai Austria enggau Jerman ba kimpin spesial. Tuju kimpin tu deka nunjukka chara belajarka Bup Kudus enggau pechuma ngena bansa jaku Arab. Bisi 1,782 iku menyadi kitai enggau pengawa tu. Lalu semua penyampau jam ke udah dikena sida bisi 40,724, 4,483 kali video dipandangka, lalu 24,769 iti litaricha disadung.

Beberapa taun tu, lebih ari sejuta iku orang pelari diau ba Austria enggau Jerman. Mayuh ari sida datai ari menua Arab. Pia mega, mayuh ari sida enda kala ninga Berita Manah ari Bup Kudus ti ngembuan jaku ke amat ngagaka ati. Ba Austria enggau Jerman, bisi 1,108 iku penginjil ke ngerembaika Berita Manah dalam bansa jaku Arab. Ba kimpin tu, sida deka dibantu bala menyadi ari Amerika Serikat, Kanada, sereta beberapa menua di Eropah. Sida sama begulai ngagai 24 iti endur, nyengkaum bandar besai baka Berlin, Cologne, Dresden, Frankfurt, Graz, Hamburg, enggau Vienna.

Seiku menyadi lelaki ke diau ba endur nya nulis, “Kami nadai nyangka kimpin spesial tu bisi empas ti manah ke kami. Bala menyadi ke datai ari endur bukai meri kami peransang, lalu kami amat beterima kasih ngagai sida. Kami amat gaga ulih enggau kimpin tu.”

Seiku nembiak lelaki ari menua ke ngena bansa jaku Arab datai ngagai gempuru Saksi-Saksi Jehovah. Pengudah gempuru, iya enggau ransing nanya seiku tuai gempuru, “Nama reti mahabba ba jaku Jerman?”

Menyadi nya nyaut, “Liebe (pengerindu)!”

“Au,” ku lelaki nya, “Aku ulih meda nya ba ditu! Semua kita manah enggau aku. Semua orang nanya lalu deka ngelala aku. Aku mega meda, orang ke enda sama bansa bisi basa ngagai pangan diri. Enti semua orang baka tu, dunya tu tentu nadai penyarut!”

Bisi mega nyebut utai ti manah pasal Saksi Jehovah, “Kita udah belajar chara ti manah maya begulai enggau orang. Kitai ulih nyadi siti raban ti pemadu manah ke semua orang.”

Bisi sepasang laki bini ke ngena bansa jaku Arab udah diau ba Jerman dalam urung setaun. Maya menyadi kitai nginjil ngagai rumah sida, sida nerima penatai menyadi kitai lalu mai sida ngirup teh. Pengudah menyadi kitai nerangka tuju kitai datai, bini iya lalu nyebut, “Kita tu Saksi-Saksi Jehovah enda?” Pengudah menyadi kitai madahka au, iya madah baru, “Apu, udah bebulan aku ngiga kita! Nyentukka aku ngagai palan kerita api ti besai ngambi ulih tetemuka kita. Tang diatu, ditu baru kitai betemu. Indah kita empu ke datai kitu! Tu tentu Petara ke nganjung kita kitu.”

Sepemanjai kimpin tu, bala menyadi kitai enggau ransing madahka pengadang ari Bup Kudus ngagai “semua bansa”, lalu pengawa sida amat diberekat Jehovah.—Matthew 28:19.