Dalam bulan Julai enggau Ogos 2020, bejuta iku Saksi-Saksi Jehovah enggau orang bukai ke bisi minat, begulai meda program konvensyen taun 2020.

Enggau gagit ati, Saksi-Saksi Jehovah di serata dunya nganti Konvensyen “Seruran Gaga Ati”! Sida indah udah merambu deka bejalaika program nya dalam Palan Gempuru, tauka stadium enggau bengunan besai ke disewa. Taja pia, ngambika nyaga pengerai orang ke datai, Raban ti Ngiring mutuska nginsil pelan nya lalu ngenataika program konvensyen di serata dunya nengah online. Kenyau ari 1897, tu meh keterubah iya Saksi-Saksi Jehovah enda bejalaika konvensyen sida enggau orang mayuh.

Kenneth Cook, Jr., seiku ari Raban ti Ngiring nerangka: “Lebuh semua konvensyen pelilih menua kena kinsil, kami berunding, manah amat enti sema semua orang di serata dunya ulih begulai “datai” konvensyen ba maya ti sama. Kami pan nemu, kena ngemujurka pelan nya, program konvensyen patut disalin ngagai beratus bansa jaku dalam kurang empat bulan aja. Kesuah iya, projek ti besai baka tu begunaka setaun lebih kena tembu. Tang kena 6 Julai 2020, sesi keterubah dikeluarka dalam kira-kira 400 bansa jaku. Nya endang siti berekat. Ke pengujung iya, program tu deka disediaka dalam 511 iti bansa jaku!”

Seiku menyadi indu nya indai tunggal ke bisi tiga iku anak. Iya nerangka pasal penguntung ke diulih ari meda konvensyen nengah online: “Taja pan kami lelengauka bala kaban, atur tu amat manah ke bala anak aku. Ari ke meda semua program dalam tiga hari, kami meda tiap sesi enggau awak ti enda lama dalam beberapa minggu. Tu nulung sida mengkang fokus ba program. Enti sida deka ngetu enda lama, kami ngetuka video nya dulu. Kami enggai tinggal indah seminit pan ari program nya. Program sesi hari lima ngingatka kitai, bala anak sempama laja ti patut ditimbakka lurus ke mua, ngambika bulih pengidup ti lantang sereta puas dalam sembah ngagai Jehovah. Meda program konvensyen nengah online sigi udah nulung aku ngereja nya.”—Masmur 127:4.

Penyerita di serata dunya minat pasal konvensyen kitai. Ambika chunto, Robert Hendriks ti ngemataka Begian Penerang ke Orang Mayuh ba Amerika Serikat madahka: “Mayuh penyerita nulis berita pasal konvensyen online kitai. Semua berita tu nerangka pasal gerempung kitai ti ngena teknologi enggau manah ngambika ngenataika program nya, lalu ba maya ti sama, ngemeratka pengelikun sereta pengerai orang mayuh.”

Konvensyen taun 2020 ke betajuk “Seruran Gaga Ati”! nunjukka siti agi chara Jehovah nyadi Pengajar ti pemadu manah ke kitai.—Isaiah 30:20.