Sepemanjai taun nginjil 2020, Saksi-Saksi Jehovah napi mayuh penusah ti baru. Taja pia, semua penusah tu meri peluang ngayanka pengeran bala menyadi Kristian ti deka mengkang tetap ati ngagai Petara, sereta beserakup enggau pangan diri.

Penusah ke pemadu besai ditapi kitai, iya nya penyakit COVID-19. Penanggul ke nyadi ketegal penyakit tu baru iya diasaika mayuh orang.

Saksi-Saksi Jehovah ngaga ubah enggau lengkas maya nemu pasal pengelekai penyakit tu. Sida jejampat ngiga chara baru ngambika terus begempuru, meransang pangan diri, sereta nusui Berita Manah.

Aram beratika sekeda ari “berita ti manah” ke nyadi ba taun ti nyelai tu.—Jaku Dalam 15:30.

Dalam taun nginjil tu, gerempung kitai ngeluarka semua tauka sebagi ari Bup Kudus Salin Dunya Baru dalam 36 bengkah bansa jaku. Ketegal bisi sekat bekaul enggau COVID-19, kesuah iya, salin Bup Kudus nya dikeluarka nengah siti cheramah ke dipeda mayuh orang nengah online tauka TV. Diatu, semua tauka sebagi ari Bup Kudus Salin Dunya Baru ulih dibacha dalam 193 bansa jaku.

Berengkah ari 18 Mac 2020, tiap bulan bala Raban ti Ngiring ngaga siti video pasal penusah COVID-19, ti dikeluarka ba jw.org sereta aplikasi JW Library.

Ba video keterubah nya, Menyadi Stephen Lett madahka, taja pan pengelekai penyakit tu mai mayuh stres, tang nya mega siti bukti “kitai benung idup ba pengujung hari ti penudi. Iya ke amat, tu amat amat pengujung hari ti penudi!”

Menyadi Stephen Lett madahka, taja pan tu maya ti amat tusah, “Kitai ke nembiak Jehovah enda ibuh panik.”

Ba tiap iti video nya, kitai nerima riput ari menyadi kitai di serata dunya. Semua riput tu nunjukka, ngasika atur ari Raban ti Ngiring mulaika penguntung ke kitai. Pegawai perintah suah muji gerempung kitai laban ngayanka penemu-dalam ngaga ubah enggau jampat, nitihka gaya pengelekai penyakit tu.

Bepuluh taun ti udah, Saksi-Saksi Jehovah sigi begempuru ninting taun ngambika ngintu Makai Malam Tuan. Tang taun tu, pengawa begempuru enda ulih dipejalaika, tauka bisi sekat. Ketegal tu, mayuh menyadi kediri aja, tauka begulai enggau diri sebilik, nyediaka ruti enggau wain lalu ningaka cheramah Ngingatka Pemati Jesus nengah video call.

Ba sekeda menua, bala menyadi enda ulih begempuru nengah video call. Tu meh utai ke nyadi ba endur ke dipegai 11 pampang opis ba Afrika. Semua pampang opis tu ngaga atur ngambika cheramah Ngingatka Pemati Jesus ulih dipandangka ba stesen TV tauka radio. Atur tu nejuka lebih ari 407,000 iku penginjil ningaka program nya seretai enggau orang bukai ke bisi minat ti enda ulih diitung.

Raban ti Ngiring ngemendarka sekeda pampang opis ngaga atur mandangka gempuru ba TV enggau radio, baka ke udah dikereja maya Ngingatka Pemati Jesus. Enggau tu, bala menyadi kitai ke diau ba endur ti tusah deka bulih internet, agi ulih ningaka program gempuru ninting minggu ngena TV tauka radio. Naka ke diatu, bisi 23 pampang opis ke ngereja utai ti sama di Afrika, Eropah, Amerika Utara enggau Amerika Selatan.

Ketegal penusah COVID-19, mayuh ari menyadi kitai tusah ngulihka utai ke diguna sida kena beridup. Di serata dunya, lebih ari 400 Komiti Tulung Pengerusak Alam udah ditumbuhka kena nyediaka utai ke diguna besehari-hari ngagai menyadi kitai ke enda ulih ditulung eklisia ba endur nya. Dalam taun nginjil 2020, Raban ti Ngiring mutuska ngena duit enggau penyampau $18,000,000 U.S. (RM 74,880,000) ngambika nulung 330,000 iku penginjil.

Tu meh kali keterubah bala menyadi kitai di serata dunya meda program konvensyen pelilih menua ba rumah sida empu. Bala Raban ti Ngiring enggau bala penulung sida ngenataika semua cheramah nengah video. Semua video nya disalin ngagai lebih ari 500 bansa jaku. Program konvensyen nya lalu dikeluarka ba jw.org enggau aplikasi JW Library ngambika semua penginjil sereta orang bukai ke bisi minat ulih meda program nya enggau likun ba rumah sida empu.

Ba sekeda menua, bala menyadi kitai ukai semina napi penanggul bekaul enggau COVID-19, tang pia mega, sida majak balat diperinsa.

Setaun ti udah, piak bekuasa ba Rusia nyelungkai rumah beratus iku menyadi kitai, lalu nangkap mayuh ari sida. Ke diatu, 42 iku menyadi kitai ke lelaki enggau ke indu benung dijil ba Rusia, pia mega enggau 2 iku ke bukai ba Crimea. Kenyau ari Kot Besai Rusia ngaga pemutus pasal Saksi-Saksi Jehovah kena taun 2017, lebih ari 1,000 buah rumah menyadi kitai udah diserungkai.

Tang menua alai pemadu mayuh menyadi kitai dijil, iya nya Eritrea. Entara 52 iku menyadi ke dijil dia, 3 iku ari sida udah dijil kenyau ari 17 September, 1994 ketegal sida enggai nyadi soldadu. Nama sida tu Paulos Eyasu, Isaac Mogos, enggau Negede Teklemariam. Bisi mega 26 iku menyadi lelaki enggau indu ke udah dijil lebih ari sepuluh taun udah.

Awakka kitai terus besampi ke bala menyadi kitai ke dijil, ngambika sida mengkang berani. Sida nunjukka diri tetap ati seagi sida betan natka diri diperinsa.—Pemandang 2:10.

Dalam taun nginjil ti udah, bala Saksi di serata dunya ngayanka penaluk ngagai Jehovah seraya sida nguji mayuh chara nginjil, ngiga chara ti baru kena meransang pangan diri, sereta nitihka atur ari Raban ti Ngiring enggau perintah menua.

Ba semua pengawa sida, bala menyadi kitai ngayanka pengerindu ti besai ngagai Penempa sida. Pia mega, penetap ati sida nya deka nulung sida betan lebuh penguji ti besai agi datai dudi hari.—James 1:2, 3.