Majlis tembu sekula Gilead kelas ke-148 nyauka sama baka selama, kelimpah ari siti utai ke bebida, iya nya, nadai orang bukai bisi enggau ba palan nya. Semua peninga meda sereta ningaka program ke dipandangka terus nengah streaming. Program ti ngeringka pengarap tu nyadika siti ari bukti ti nunjukka gerempung kitai ulih jampat berubah nitihka gaya dunya.

Program nya dipejalaika kena 14 Mac 2020, ba Palan Belajar Saksi-Saksi Jehovah di Patterson, New York. Menyadi Stephen Lett ari Raban ti Ngiring nyadi chairman ke program nya. Sehari nya, 55 iku pemelajar nembuka pelajar sida. a

Beberapa minggu sebedau program nya, mayuh amat riput berita ari serata dunya madahka pasal penyakit COVID-19 ke majak ngelekai ba mayuh endur. Baka ke kala diriput ba Ruang Berita ba jw.org, Indu Opis Saksi-Saksi Jehovah enggau bendar beratika utai ke nyadi pasal penyakit nya, lalu meri lalau ti sejalai enggau iring ari piak ti bekuasa, ngagai semua eklisia.

Siti ari iring ke diterima lalu diperatika Raban ti Ngiring, iya nya, seliahka begempuru enggau orang mayuh. Nya kebuah sida ngaga pemutus, nadai temuai ari luar ulih enggau program nya, lalu kelimpah ari nya, nadai peninga bukai ulih datai ke palan alai program nya diatur. Bala diri sebilik Betel enggau bala pemelajar nyadi chunto ti manah pasal nitihka atur.—John 13:34, 35.

Sida ke dibai bala pemelajar Gilead datai, enggau diri sebilik Betel, ulih meda program nya ke dipandangka terus. Atur nya nejuka lebih ari 10,000 iku bala menyadi ari serata dunya, nyengkaum bala kaban enggau diri sebilik bala pemelajar, terus meda program tekala nya.

Raban ti Ngiring keran deka nentuka semua pengawa ti ngeringka pengarap kitai, kelebih agi gempuru kitai ninting minggu, diteruska taja pan COVID-19 majak ngerampit. Ngambika pelan tu ulih mujur, Raban ti Ngiring baru meri iring ti nyemetak ngagai semua Betel di serata dunya pasal chara ngaga ubah ba pengawa kitai nitihka gaya sesiti endur. Kekadang, tu reti iya bala menyadi deka begempuru ba raban ti mit ari biasa, tauka, begempuru ngena video call. Kitai andal, bala menyadi kitai di serata dunya enda ngelengkaka sebarang peluang ngulihka peransang sereta iring ti diguna ari gerempung Jehovah.

Endang nyata, nadai utai ulih nagang kuasa Jehovah ari nulung gerempung Iya mutarka sebarang penanggul.—Masmur 18:29.