Kena malam 15 November 2018, Menyadi Aleksandr Ursu pansut ari pintu penama rumah iya ba Dzhankoy, Crimea, laban ngampan penatai anak iya Viktor. Maya nya, Aleksandr beumur 78 taun. Iya tekenyit meda lampu manchar ari belakang dinding ba luar rumah iya. Enggau bejimat iya mansang ngagai penampak nya. Enda memukai, iya ninga orang nyerauh: “Ngetu! Polis!”

Keterubah iya, Aleksandr ngumbai nya bala menyadi ke betundi aja, ngaga diri baka polis. Tang enggau jampat Aleksandr sedar tu ukai jaku tundi aja. Seiku lelaki ke nutup mua diri maut lengan Aleksandr, lalu melawikka jari iya ba belakang tubuh iya enggau chara ti kasar. Seiku agi lelaki ke nutup mua diri mukut rang Aleksandr. Enam iku pegawai FSB ke bepegaika senapang meresa Aleksandr seduai Viktor sebedau nyerebu rumah Aleksandr.

Bini Aleksandr ke benama Nina bisi ba dapur lebuh pegawai datai nyerebu. Seiku pegawai ngerampas talipun binching ari jari Nina lalu nanya iya nama utai ke benung dipeda iya ba dia. Bala pegawai nyerungkai rumah sida pengelama bejam-jam, tang nadai tetemuka sebarang litaricha ke dikumbai perintah Rusia “ekstremis”.

Baik meh Menyadi Aleksandr enda ditangkap malam nya. Taja pia, iya enggau semua Saksi-Saksi Jehovah bukai ke diau ba Rusia enggau Crimea nemu, barang maya sereta barang endur rumah sida engka deka diserungkai polis lalu sida engka ditangkap. Siti utai ke udah nulung Aleksandr betan napi perinsa tu, iya nya belematika chunto ti manah ari sida sebilik sereta utai ke kala diasaika iya suba lebuh diperinsa maya jeman Soviet Union.

Kena tengah malam 6 Julai 1949, lebuh Aleksandr beumur semilan taun, bala soldadu Soviet tama lalu nyerungkai rumah sida Aleksandr sebilik. Sida nikauka semua barang sida sebilik ba lantai lalu ngasuh sida nyimpan barang ke diguna sida dalam bik. Aleksandr ngenang utai ke nyadi: “Lebuh sida soldadu malik ke bukai, indai aku ngelalaika litaricha Bup Kudus, nyengkaum bup The Harp of God, entara barang kami.” Bala soldadu nya lalu nabanka semua sida sebilik ngagai stesen kerita api.

Enggau berani sida Aleksandr sebilik begulai enggau bala Saksi ke bukai ba kerita api nya belaguka lagu Perintah Petara seraya sida ditaban ngagai Siberia, alai sida semua deka dipindahka. Sida tu entara beribu-ribu iku Saksi ke diburu ngagai Siberia entara taun 1949 ngagai 1951.

Kena 1950-an, bala menyadi ba Siberia belalai begempuru ba ladang alai sida gawa. Sekeda ruang bilik bedarat penyauh 20 kilometer (13 batu) ngambika datai gempuru.

Aleksandr belajar mayuh ari teladan ti manah entara sida sebilik. Ari sepiak apai; aki ichit iya ke benama Makar, aki iya Maksim, madi aki iya Vladimir sereta apai iya Pyotr semua nyadika teladan ti manah pasal pengeliat ati enggau penetap ati.

Ketegal enggai nyadi soladau, apai Aleksandr diberi ukum jil pengelama sepuluh taun kena 1944. Tang iya dibibaska pengudah ditan tiga taun ketegal iya bakal ba tulang belakang lalu enda ulih bejalai agi. Aleksandr agi ingat maya apai iya madahka iya cherita ari Bup Kudus pasal David ke ngelaban Goliat, sereta kaul ti rapat iya enggau Jonatan.

Aleksandr ngenang: “Madi aki aku Vladimir seruran ningaka stesen radio WBBR sereta nerima litaricha Bup Kudus. Maya nya, perintah menua nagang orang ari ngena radio. Nyadi, aya aku nirika siti bilik ba baruh tanah alai iya enggau orang ke bisi minat ulih ningaka program ari stesen radio WBBR enggau likun.”

Kena 1940-an, seiku orang ke ngaga diri baka ke bisi minat deka belajar, madahka pasal endur alai sida begempuru ngagai piak ti bekuasa. Aki Aleksandr enggau madi iya, Vladimir, sama ditangkap lalu dijil ba Khotyn di Ukraine barat, enggau penyauh 80 kilometer (50 batu) ari kampung sida.

Aleksandr nerangka: “Maya nya, ini aku bedarat ngagai rumah jil ngambika ngabas sida. Iya nusui ngagai kami, sida ulih mengkang gaga ati ketegal pengarap sida. Taja pia, seduai iya berupai dijamah orang ba dia.” Sayau amat, seduai iya mati dalam rumah jil nya.

Aleksandr nampung: “Nyentukka diatu, kami enda nemu nama utai ke nyadi ba sida, baka ni sida mati, tauka dini alai sida dikuburka. Tang kami diperansang laban nemu sida mengkang tetap ati ngagai Jehovah nyentukka mati.”

Teladan ti manah ari kaban belayan, sereta peneleba iya empu maya ditaban ke Siberia, udah nulung nyikap Aleksandr napi pemerinsa ke diasaika iya diatu. Ku iya: “Pasal rumah kami ke diselungkai, aku udah teleba. Tu endang udah nyadi kenyau ari maya aku agi mit. Jehovah udah nyaga kami suba, lalu iya deka terus ngelindung kitai dudi hari.”

Aleksandr nambah: “Bisi utai bukai ke ngeringka aku, baka macha Bup Kudus ninting hari, belematika utai ke dipelajar, bejarit datai gempuru, sereta begulai enggau bala menyadi.”

Iya mega suah macha pasal penguji enggau pemerinsa ke ditapi menyadi bukai, lalu iya bulih pengering ari belematika pemerani sida. Iya madah: “Lebuh aku macha utai ke disebut bala menyadi dalam jaku penutup sida ba kot, aku ingat, jaku sida tu ngamatka utai ke dipadah Jesus: ‘Kita deka kena pechara di mua gabenor enggau raja ketegal aku, ngambika kita besaksika pasal aku ngagai sida enggau ngagai orang bansa bukai.’—Matthew 10:18.

Ketegal sukung ari Petara kitai Jehovah, bala menyadi kitai ukai semina natka diri diperinsa, tang sida nyadi majak kering. Pengidup sida nyadika bukti pasal pengamat jaku David ke nulis: ‘Semua orang ke ngiga pengelikun dalam [Jehovah], gaga ati; lalu. . . sida belagu gaga ati.’—Masmur 5:11.