Saksi-Saksi Jehovah deka semampai ingatka bulan November 2020, laban nya meh bulan ti amat spesial. Ketegal penyakit berampit, pemayuh ari kitai diau aja ba rumah. Chara ti selalu dikena kitai nginjil udah diketuka. Taja pia, nembiak Jehovah di serata dunya bejalaika kimpin kena meritaka Perintah Petara. Bejuta iku penginjil ba sebarang alai bebendar nyadung majalah Menara Jaga No. 2 2020 ngagai endur bisnes, bala pegawai perintah, pengajar, kaban, kaban belayan, sereta barang sapa ke deka nerima. Pengawa tu meransang mayuh orang ke deka ningaka pesan tu. Tang kelimpah ari nya, kimpin tu pan ngagaka ati sereta meransang semua penginjil ke bisi ungkup ba pengawa tu.

Peratika sekeda peneleba ke diasaika, sereta komen ari bala menyadi kitai di serata dunya:

Lucinda Furkin nya seiku menyadi indu ke baru dibaptisa ba Australia. Iya beumur lapan-belas taun. Ku iya nulis: “Taja pan maya nya aku napi penyakit raya, tang aku ngasaika Jehovah baka ke megai jari aku, manjung lalu meransang aku, sereta meri aku pengering ke diguna aku ngambika ulih betan.”

Seiku apai ba New Zealand nerangka baka ni kimpin tu udah nulung sida sebilik: “Kami duai bisi empat iku anak indu ke beumur 7, 9, 11 enggau 13. Kami sebilik ngasaika, Apai kitai ke penuh pengerindu, iya nya Jehovah, udah meri pengawa ti spesial tu ngagai kami empu. Tu nulung kami tetap nitihka jadual nginjil kami ninting hari.

Kagiso seduai Lydia Marumo ngereja pengawa tuai ti ngabas. Seduai iya nganjung fail bansa elektronik majalah nya ngagai bala kaban belayan ke ukai Saksi. Beberapa iku ari sida malas mesej nya lalu mantaika terima kasih ngagai seduai iya. Seiku kaban belayan Kagiso nya nyadi lutur, lalu iya madahka, iya nerima majalah nya ba maya ti ngena. Iya nerangka, sekeda ari pesakit ke diperesa iya bisi mayuh tanya pasal Petara enggau Bup Kudus. Lalu bala anak iya empu masuk champur dalam pengawa ke bekaul enggau roh ti jai. Malam nya, Kagiso seduai Lydia betalipun ngagai kaban belayan nya lalu berengkah belajarka Bup Kudus. Diatu, sida belajar dua kali ninting minggu.

Soroya Thompson, seiku pengerintis ba Ontario nulis munyi tu: “Kimpin tu nulung aku berfokus baru ba utai ti beguna agi sereta ngingatka aku, agi bisi mayuh pengawa nginjil ke bedau tembu. Tu mega nyadika siti pengingat pasal pemesai pengerindu Jehovah, laban kimpin tu nunjukka Iya enggai ke indah seiku pan orang dipunaska. Ketegal aku dikingatka pasal pemendar tu, aku diperansang bagas agi nginjil sepemanjai kimpin spesial tu.”

Seiku menyadi indu ari British Columbia madah: “Nya maya ti amat ngirauka ati, nyadi aku mutuska nyadi penginjil sukung laban tu deka nulung aku ngelaban asai ati ti negatif sereta depression. Nya ngelantangka ati aku lalu pia mega nulung ruang bilik aku.”

Pampang Opis Kanada madahka, kimpin tu ngerapatka agi kaul ba mayuh ruang bilik. Pia mega, bala anak mit ngasaika diri beguna ba pengawa tu, laban sida ulih nulis surat diri empu, tauka nulung sida sebilik nulis alamat enggau lekatka setem ba sampul surat, tauka ngiga alamat alai sida deka nganjung majalah nya.

Menyadi Timo Tuomisto enggau bini iya Eeva ngereja pengawa tuai ti ngabas. Ku sida: “Kami diau jauh tungu ke utara menua kami. Dalam bulan November, amat petang ditu. Tang bala menyadi, kelebih agi sida ke pengerintis, amat beterima kasih ke kimpin tu, ti nulung sida ngembuan runding ti positif taja pan hari nya petang.”

Sepasang laki bini nganjung majalah nya ngagai seiku orang ke ditemu sida. Iya malas surat nya engau nulis: “Saritu, [aku benung macha bup] James dalam Bup Kudus. Dia madah, pengarap mati enti iya nadai pengawa. Saksi-Saksi Jehovah seruran deka betemu enggau orang ngambika ulih nerangka sereta ngajar Bup Kudus. Sida ngereja pengawa ti ngeringka pengarap.”

Pampang Opis Greece nerangka: “Mayuh menyadi nyau udah lelak idup nitihka sekat sereta bekurung ba rumah ketegal penyakit berampit. Kimpin tu meri sida peransang ke diguna, ngambika sida berasai nyamai baru. Mayuh ari sida nyemaka kimpin tu baka tetemuka ai ba menua ti rangkai!”

Menyadi Suzie Kontargiri mutuska nyadi pengerintis sukung, taja pan iya napi penanggul ba pengerai lalu laki iya enda sepengarap. Ku iya: “Ketegal kimpin tu, aku kurang napi ati ti balat tusah. Ninting pagi aku lantang ati lebuh dani, ngereja pengawa ba rumah, manduk, ngintu laki aku, lalu udah nya belabuh nginjil. Laki aku suah nanya ‘Enda ka nuan bisi nginjil saritu?’ laban iya udah teleba meda aku begulai nginjil enggau bala menyadi indu enggau ati ti gaga.”

Menyadi Tamaki Hirota nulis surat ngagai pegawai perintah. Ku iya madah: “Jehovah meh ke ngepunka pengawa nginjil nengah surat dulu kelia. Iya udah nulis 66 iti surat ngagai semua mensia. Lalu dalam beribu taun ti udah, mensia nandu macha nya ngambika datai semak agi ngagai Iya. Jehovah nemu chara nginjil tu amat ngena. Kimpin tu deka dikingatka kitai nyentukka belama iya.”

Menyadi Meharaja Vijaya enggau Imayanathan Amutha enda sengaja betulis surat nuju ngagai alamat ti sama. Orang ke diau ba rumah nya terus muai surat ti keterubah diterima iya lalu enda macha iya. Tang udah nya iya tepedaka surat ti kedua. Iya berunding, enti surat nya dianjung dua kali, tentu iya ngembuan pesan ti berat. Iya macha majalah lalu betalipun ngagai menyadi indu ke nganjung surat kedua nya, lalu minta belajarka Bup Kudus.

Seiku pegawai betalipun ngagai Pampang Opis Sri Lanka pengudah nerima majalah tu. Iya madahka diri nadai kala betemu enggau Saksi-Saksi Jehovah, taja pan iya empu orang Kristian. Pengudah iya meri puji pasal pesan majalah nya enggau utai ke ditemu ba laman web kitai, iya nanya: “Baka ni ku chara aku ulih nyadi seiku ari Saksi-Saksi Jehovah?” Tekala nya, bala menyadi ba pampang opis ngaga atur ngambika seiku Saksi ngabas iya.

Seiku penginjil ke beumur 13 taun belajar ba sekula alai topik pasal politik suah dikerandauka. Iya nerangka baka ni kimpin tu udah nulung iya: “Aku berasai kempang agi ati ulih nerengka ngagai bala pengajar nama kebuah aku ka mengkang neutral. Tu ngeringka pengarap aku.”

Menyadi Margit Haring ngasaika utai ti sama. Ku iya nulis: “Aku ulih ngemansangka kualiti pemerani enggau pengeransing. Keterubah iya, aku kesal ati deka bejaku enggau orang bedagang sereta pegawai perintah. Tang laban aku udah belajar chara ngetanka pengarap diri enggau nelap, aku ngasaika diri disikap kena napi penguji ti deka datai dudi hari.”

Seiku tuai gempuru madah: “Ati aku amat ditegu laban mayuh menyadi deka ngerintis bulan nya taja pan napi penanggul ba pengarai. Sida engka ngumbai diri nadai pengering kena ngerintis. Taja pia, sida ngambi peluang tu ngambika bejalaika ungkup sida ba kimpin tu. Mayuh ari kami nyabak laban sinu ninga sida madahka diri beterima kasih sereta gaga ati ketegal Jehovah enggau bala menyadi sida.”

Bisi amat mayuh cherita enggau komen ke bukai ari menyadi kitai di serata dunya, indah nyau kelalu mayuh nyentukka enda ulih ditulis ditu. Peluang nusui pasal Perintah Petara ngagai bejuta iku orang endang ngagaka ati kitai semua.—John 15:11.