Kena 29 Mac 2021, Kot Pelilih Gagarinskiy ba Nengeri Sevastopol, Crimea, ngumbai Menyadi Viktor Stashevskiy besalah lalu meri iya ukum jil pengelama enam taun setengah. Tekala nya, Viktor lalu dibai ke rumah jil. Iya deka ngapil pemutus tu.

Viktor Stashevskiy

• Ada: 1966 (Kansk, Begian Krasnoyarsk, Russia)

• Biograpi: Kena tuan 1983 iya pindah ke Sevastopol, Crimea. Iya udah pinchin soldadu tasik kena taun 1993. Iya jadi enggau bini iya Larisa kena taun 2002. Seduai iya bisi dua iku anak indu. Kenyau ari suba iya amat alit ati lebuh beratika pemesai enggau pemanah atur semua planet enggau bintang ba dunya raya. Iya deka ngelala penempa semua utai tu. Kenyau ari maya iya berengkah belajarka Bup Kudus, pengidup iya bisi reti. Iya dibaptisa nyadi Saksi Jehovah kena 2004

Kena 4 Jun 2019, bala pegawai Federal Security Service (FSB) nyerungkai sepuluh buah rumah Saksi-Saksi Jehovah ba Sevastopol. Sekeda ari rumah nya diserungkai pengelama empat jam. Lebuh maya nya, bala pegawai enda nyagi bala menyadi kitai tauka ruang bilik sida ngirup ai tauka ngena jamban. Bala pegawai nya ngemba bala menyadi nya, lalu indah ngemba deka ngerusak rumah sida, tauka ngelalaika dadah ba rumah sida ngambika dadah nya ulih “ditemu” polis, lalu menyadi nya deka didawaka ngereja pengawa jenayah.

Asil ari serungkai rumah nya, Menyadi Viktor Stashevskiy ditangkap lalu ditan semalam ba jil. Iya dituduh “ngiring ba gerempung ekstremis.” Ke bendar iya, iya didawa ketegal pengarap iya, lalu tuduh tu ngelanggar hak iya nitihka undang-undang menua.

Viktor madah, macha Bup Kudus sereta belematika utai ke dibacha iya nulung iya mengkang berani sereta betan enggau ati ti gaga. Kelebih agi, iya madahka jaku Raja David ba Masmur 62:5-8 meri iya pengering. Dalam semua penguji ke ditapi iya, Viktor madah: “Kaul aku enggau Jehovah majak tegap laban Iya seruran berimbai enggau aku. Iya semak agi ngagai aku ari sebarang orang bukai. Aku enda sekali-kali kakang pasal Jehovah, ti nemu pemerinsa ke ditapi aku sereta nemu pengeran aku deka mengkang taluk ngagai iya. Aku pan andalka, ba maya ti ngena, iya deka nulung aku laban Iya pan deka ngetanka nama Iya ti kudus.”

Kitai nemu Jehovah tentu deka terus nyukung Viktor, ruang bilik iya, sereta semua bala menyadi Kristian kitai ke disakal ketegal pengarap. Jehovah deka seruran nyadika penyaga enggau pengelindung sida.—Masmur 91:2.