Ngambika begempuru enggau likun seraya penyakit berampit di serata dunya, mayuh eklisia ngena perengka elektronik enggau internet enggau mayuh macham chara. Tang sekeda ari menyadi kitai ke diau ba endur alai nadai line internet patut bebendar agi ngiga chara ngambika datai begempuru. Sida mega patut bejimat nyaga pengelikun seraya penyakit COVID-19 ngelekai. Peratika sekeda chunto menyadi kitai di benua Afrika.

Mayuh menyadi ba Malawi nadai internet, nyadi sida enda ulih begempuru nengah Zoom. Tiap minggu, menyadi ari Pampang Opis Malawi nganjung video program gempuru ngagai tuai gempuru ari tiap iti eklisia nengah line talipun binching. Udah nya, tuai gempuru deka bekunsika video nya ngagai genap iku penginjil ba eklisia iya.

Tang, enda senang ke 28 iku penginjil ari Eklisia Tcharo ke diau ba endur bebukit ba Malawi utara, semak Danau Malawi. Ketegal endur alai sida diau dikelinggi mayuh bukit ti tinggi, seiku tuai gempuru patut bejalai jauh ngambika nyapai line talipun ti kuat agi kena nerima fail video nya. Udah nya, lebuh iya pulai baru, iya bedarat nengah endur ke bebukit ngagai rumah tiap iku menyadi. Iya enda tama rumah, tang ba luar rumah sida ngambika nganjung fail video nya ngagai perengka elektronik sida nengah teknologi Bluetooth.

Baru-baru tu, bala tuai gempuru nemu bisi endur ke semak rumah sida alai line talipun chukup kuat, iya nya, ba Danau Malawi. Enti sida nepan perau, belayar ke danau nya, sida ulih bulih line talipun laban udah chukup jauh ari bukit tinggi. Dia meh alai sida download fail ke diguna eklisia sida. Tu ngurangka jam ke dikena sida ninting minggu ngambika semua menyadi ulih ningaka program gempuru.

Ngambika tuai ti ngabas ulih “ngabas” eklisia ke jauh ari bandar di Mozambique barat laut, sida patut ngenataika cheramah nengah talipun. Tang, ke suah iya, konferen call enggai nyadi ba menua nya. Ngambika mutarka penanggul tu, sekeda tuai ti ngabas nusunka beberapa iti talipun di mua iya lebuh ngenataika cheramah iya. Tiap iti talipun nya call ngagai ruang bilik ti enda sama ba eklisia nya.

Sekeda penginjil diau ba kampung alai nadai line talipun. Maya sida deka begempuru, sida bejalai kaki dalam babas nyentukka sida tetemuka endur ke bisi line. Barang endur ke bisi line, sida terus duduk dia aja lalu ningaka program gempuru.

Menyadi Yohane Vinho seiku tuai ti ngabas ba endur nya. Iya nerangka: “Mayuh menyadi amat ransing, sereta enggau naka ulih datai begempuru ngambika bulih penguntung.” Tu nulung sida mengkang tegap ba pengarap taja pan bekurung. Seiku agi tuai ti ngabas ke benama Carlos Cortazão mega nerangka: “Kami ngasaika diri baka ke agi begempuru ba Palan Gempuru, lebuh kami ningaka komen pangan diri sereta belagu begulai. Tulung ari Jehovah nyata dipeda ari chara Iya nentuka nembiak Iya agi ulih belajarka Bup Kudus indah maya penyakit berampit nyadi.”—John 21:17.