Penyakit coronavirus nya amat balat ba orang tuai, lalu ulih ngachau nyawa. Ketegal tu, menyadi Kristian ti udah tuai ngayanka penemu-dalam lebuh nitihka atur ari piak pemesai pengerai ti ngasuh sida diau ba rumah aja lalu anang bejalai ngapa. Taja pia, sida enda kediri, lalu sida ukai nadai pengawa ba rumah. Ketegal pemansang ba perengkah elektronik, sida agi ulih begempuru sereta nginjil.

Kenyau ari sebedau penyakit berampit tu udah balat nyadi, seiku menyadi indu ke beumur 94 taun diau aja ba rumah iya di Rome, Itali. Ngelama tu iya meda gempuru ke udah dirikut nengah JW Stream. Tang, lama udah iya nadai peluang meda enggau ningaka gempuru ari eklisia iya empu. Taja pia, diatu bala tuai gempuru ba eklisia iya ngaga atur ngambika gempuru sida dipejalaika nengah perengkah video call. Ketegal atur tu, menyadi indu nya tadi ulih meda genap iku menyadi Kristian ba eklisia iya, sereta ningaka cheramah enggau komen ke diberi bala menyadi ba eklisia iya empu.

Menyadi Stephanie Aitken udah bengal, lalu iya diau ba rumah orang tuai di Spanish Fork, di Utah, Amerika Serikat. Ketegal penyakit berampit, temuai ari luar enda dikemendarka tama dalam rumah alai iya diau. Seiku tuai gempuru enggau bini iya nulung Menyadi Aitken nerangka chara download aplikasi ngambika iya ulih video call. Ari luar pintu penama bengunan nya, nengah cheremin, sida ngena jaku bengal bisu nulung iya. Pengudah Menyadi Aitken mujur download aplikasi nya, iya chukup gaga ati lalu merap perengkah elektronik iya. Iya amat beterima kasih laban agi ulih begulai enggau bala eklisia iya.

Bala menyadi kitai di serata dunya, nyengkaum sida ke tuai, belajar chara baru ngena perengkah elektronik kena mutarka penanggul bekaul enggau penyakit berampit ti engka ulih nekul pengawa kitai. Tu ngingatka kitai pasal semaya Jehovah ti madah, baka anak mit ti ditusu indai, kitai bulih penguntung ari semua pemansang ba teknologi di dunya tu. (Isaiah 60:16) Kitai andalka Iya deka nyadika Diri sebarang utai ke dikedekaka Iya ngambika nulung nembiak Iya ba maya ti tusah.