Tu taun ketiga konvensyen kitai bisi penerang audio. Video enggau penerang audio nyengkaum penerang pasal gambar sereta utai ke nyadi ba video lalu tu nulung orang ke buta tauka orang ke enda lansik meda. Saksi-Saksi Jehovah terus ngeluarka penerang audio ngambika penerang pasal Bup Kudus ulih ditemu kira-kira 43 juta iku orang ke buta sereta 295 juta iku orang ke enda lansik meda ba serata dunya.

Dr. Joel Snyder, presiden Gerempung Penerang Audio LLC, seiku pakar senentang penerang audio ti tebilang madah: “Aku amat alit ati meda chara Saksi-Saksi Jehovah meri penerang ngagai orang ke buta enggau orang ke enda lansik meda. Mayuh orang nadai runding deka ngaga penerang audio ngambika orang ke buta ulih meretika video nya. Nyadi aku amat beterima kasih ngagai Saksi-Saksi Jehovah laban ngereja tu.”

Lebuh Raban ti Ngiring mutuska deka ngeluarka konvensyen taun 2020 nengah online ketegal pandemik, sida mega deka ngaga penerang audio. Opis Penyaup Penyalin ba Indu Opis Saksi-Saksi Jehovah di Warwick, New York, Amerika Serikat, ngeluarka penerang audio ke konvensyen ba taun 2020. Ba taun 2021, pengawa tu diberi ngagai Begian Nyediaka Teks ba Palan Belajar Menara Jaga di Patterson, New York. Tim penerang audio nerima latih pasal chara ti manah kena ngeluarka penerang audio nengah seminar online.

Dr. Snyder nerang “nuan ulih ngelatih orang nerang enggau chara ti manah.” Iya madahka, tu nyengkaum “ngena jaku ti pandak, terang, sereta nulung orang ngambarka utai ke didinga sida.”

Keterubah iya, tim penerang audio semina ninga tang nadai meda sesiti video. Tu nulung tim meretika baka ni orang ke buta enggau orang ke enda lansik meda deka ninga video tu. Tiap iku orang ba tim nulis runding sida pasal utai ke didinga. Pengudah nya, tim mainka video nya baru lalu beratika ni maya sida ulih nepuka penerang audio.

Pengawa nepuka penerang audio ba entara jaku orang ke disebut ba video nya amat tusah. Ku Michael Millen, ke gawa enggau tim penerang audio madah: “Lebuh nadai mayuh ruang alai nepuka penerang audio kami patut nepu utai ke beguna agi ngambika video nya senang dimereti. Kami nguji nerang jam, endur, pelakun sereta pengawa sida.”

Tim penerang audio patut nyeliahka runding sida empu pasal utai ke dipeda sida ba video nya. Ba bup The Visual Made Verbal, Dr. Snyder ngelalau orang ke ngaga penerang audio: “Tejuka orang ke ninga nguji ngambarka utai ke nyadi dalam video bepelasarka penerang ti neutral. Reti nya, nuan anang nyebut: ‘Iya ringat,’ tauka ‘Iya tusah ati.’ Tang sebut meh: ‘Iya ngenggamka jari,’ tauka ‘Iya nyabak.’”

Pengudah tim penerang audio tembu nulis skrip nya, pelakun nyawa ngerikut penerang audio nya. Pelakun nyawa nya patut macha skrip enggau chara ti tenang. Michael Millen nerang: “Pelakun nyawa enda patut ngasuh nyawa iya besai agi ari nyawa orang ke bejaku ba video nya. Enti pelakun nyawa nya kelalu ransing tauka kelalu mantaika emosi, tu ngasuh peninga saru ngumbai pelakun nyawa nya seiku watak ba video nya.”

Pengudah video tembu, video enggau semua fail ke diguna deka dianjung ngagai semua pampang opis ngambika sida ulih ngaga penerang audio nitihka bansa jaku sida empu. Michael nerang pasal pemayuh pengawa kena ngasilka video konvensyen ke bisi penerang audio ba taun 2020 enggau 2021. Tiap satu minit video nya begunaka tiga jam endur tembu.

Diatu, Saksi-Saksi Jehovah nyalin litaricha Bup Kudus ngagai lebih ari 1,000 bansa jaku. Taja pan penerang audio nya enda disengkaum ba penyampau nya, tang sekeda orang ngumbai penerang audio nya baka siti bansa jaku. Ku Michael: “Penerang audio nya baka video ke disalin ngagai orang ke buta. Utai ke dipeda dalam video disalin ngagai jaku ke ulih didinga.”

Kitai amat beterima kasih laban Jehovah nentuka semua orang nerima ajar ke diguna sida ngambika tegap ba pengarap!—Isaiah 65:13.