Pengawa Ngingatka Pemati Jesus taun tu chukup spesial sereta besejarah. Tu meh kali keterubah program Ngingatka Pemati Jesus dipandangka nengah TV sereta radio dalam beberapa bansa jaku di mayuh menua ba Afrika.

Atur tu nejuka lebih 407,000 iku penginjil, sereta mayuh amat orang bukai ke bisi minat ti enda ulih diitung, meda program Ngingatka Pemati Jesus. Taja pan kitai enda nemu enggau nyemetak berapa iku orang meda, tang, dalam kandang alai program nya dipandangka, bisi lebih 150 juta iku orang diau.

Ketegal penanggul bekaul enggau penyakit COVID-19, kemayuh agi orang di serata dunya meda cheramah Ngingatka Pemati Jesus nengah video call. Tang, mayuh bala menyadi kitai di Afrika diau ba endur alai amat tusah deka download fail video ari internet, laban line enda manah tauka bangat mar. Nya kebuah Raban ti Ngiring ngemendarka sekeda pampang opis baum enggau stesen TV sereta radio pasal sekalika sida ulih mandangka program Ngingatka Pemati Jesus. Menyadi kitai ke ngarika pampang opis nya besetuju deka mayar rega ti enda bangat mar ngambika program nya deka dipandangka.

Bisi 11 iti pampang opis, iya nya, Angola, Benin, Cameroon, Côte d’Ivoire, Republik Demokratik Congo, Ghana, Malawi, Mozambique, Senegal, Zambia, sereta Zimbabwe, mujur baum enggau stesen TV sereta radio sebedau Pengawa Ngingatka Pemati Jesus. Pengujung iya, cheramah nya dipandangka ba 36 iti endur, di 16 iti menua.

Angola

Enam iti stesen radio mainka program Ngingatka Pemati Jesus dalam enam iti bansa jaku: Ibinda, Kikongo, Kimbundu, Nyaneka, Portuguese, sereta Umbundu. Stesen radio nya ulih didinga orang ba endur alai pemadu mayuh orang diau di menua Angola.

Republik Demokratik Congo

Seiku pemelajar Bup Kudus udah berambu deka meda program Ngingatka Pemati Jesus kediri, laban semua ruang bilik iya nyakal Saksi-Saksi Jehovah. Tang, lebuh iya benung nyediaka diri deka meda charamah nya, apai iya ngangau ari bilik besai, “Iya udah berengkah!” Lebuh iya datai ke bilik besai nya, iya tekenyit meda semua diri sebilik begumpul dia deka meda program Ngingatka Pemati Jesus ba TV. Pengujung iya bisi sepuluh iku diri sebilik iya meda program nya.

Ba sebuah kampung enda jauh ari Luena, seiku orang ke ukai Saksi Jehovah madah: “Bala paderi kami nadai ngereja sebarang utai ngagai kami. Tang kita, kita terus nyembah Petara kita, taja pan ditekul COVID-19. Kami deka enggau kita!”

Ghana

Siti stesen TV besetuju deka mandangka program Ngingatka Pemati Jesus di serata menua dalam bansa jaku Twi. Stesen nya indah mandangka iklan kena madahka orang mayuh pasal pengawa ti deka datai tu. Kelimpah ari mandangka program Ngingatka Pemati Jesus aja, stesen nya pan mandangka video Nama Kebuah Jesus Mati? Enggau Nama Kebuah Petara Nejuka Pemerinsa Nyadi? sereta video musik Dunya Baru ti Deka Datai sereta Dunya Baru Endang Amat Deka Datai.

Senegal

Seiku menyadi Kristian indu madah: “Semua orang bisi peluang belajar pasal Jehovah nengah TV enggau radio. Nya amat ngalitka ati! Kami amat gaga ati, lalu ngasiaka berekat ari Jehovah. Kami berasai temegah ati, laban Jehovah nya Petara kami!”

Seiku menyadi Kristian indu ke bukai nerangka: “Kami enda ulih bejalaika kimpin ngemai orang datai Ngingatka Pemati Jesus ketegal COVID-19. Tang, ketegal program nya dipandang ba TV, agi bisi mayuh amat orang ke ulih meda program tu. Enggau lengkas aku betelefon ngagai bala pemelajar Bup Kudus, orang ke kala diabas aku, sereta semua orang ke dikelala aku ke ukai Saksi ngambika madahka sida pasal program tu. Semilan iku pemelajar Bup Kudus, enggau sida sebilik, ulih meda cheramah nya. Seiku ari petunggal aku di Ziguinchor meda program nya ba TV lalu minta berandauka nya enggau dalam agi. Aku amat gaga ati ke peluang tu.”

Atur ti spesial tu enggau nyata nunjukka, ba Jehovah, “semua utai ulih magang.”—Matthew 19:26.