Ketegal COVID-19, bala menyadi kitai ke diau ba rumah alai orang tuai enggau sakit diintu, enda senang deka ngintu pengawa Ngingatka Pemati Jesus. Ke suah iya, sida enda dikemendarka pansut, lalu temuai pan enda tau datai ngabas mega. Taja pia, sida ulih ngintu pengawa ti pemadu spesial tu enggau bantu ari bala tuai gempuru.

Ba Naju City, Menyadi Lee Jeon-soon enggau Menyadi Kwon Ae-soon, ke beumur 91 enggau 88 taun, sereta seiku indu bukai ke bisi minat ke beumur 96 taun, bela deka ngintu pengawa Ngingatka Pemati Jesus. Seiku ari lutur ke gawa ba rumah alai sida diintu nya pan seiku ari Saksi Jehovah. Malam nya, iya begulai enggau eklisia iya ngintu pengawa tu ari rumah dulu, lalu udah nya pulai baru ngagai endur iya gawa lalu nulung sida tiga iku indu nya meda program ke dipandangka terus ari jw.org. Iya pan nyediaka roti ti enda beragi enggau wain ke sida.

Ba Uijeongbu City, Menyadi Choi Jae-cheol gawa ba endur orang tuai diintu, lalu bisi 14 iku menyadi kitai ke tuai diau dia. Taja pan penekul ketegal penyakit berampit, iya mujur nulung bala menyadi dia, sereta orang bukai ke bisi minat, meda program nya ke dipandangka terus. Sekeda ari sida ke bisi minat nya pan berengkah belajarka Bup Kudus.

Menyadi Kim Tae-sun beumur 59 taun lalu iya diau ba Cheonan. Lima taun ti udah iya nemu diri kena penyakit kanser. Baru baru tu iya tama sepital ketegal balat amat pedis. Iya enggau seiku agi menyadi indu ke benama Kim Jeong-mi bekunsika siti bilik dalam sepital nya. Menyadi Kim Jeong-mi nya beumur 69 taun lalu iya pan kena penyakit kanser ti tau ngasuh lenyau nyawa. Pengelama penanggul COVID-19 tu, seduai iya enda tau pansut ari sepital. Tang, enggau tulung ari bala tuai gempuru, seduai iya ulih ngintu pengawa Ngingatka Pemati Jesus begulai enggau eklisia sida nengah video call.

Seduai iya nulis surat ngagai bala tuai gempuru kena meri terima kasih. Ku sida: “Terima kasih laban nulung kami duai ngintu Ngingatka Pemati Jesus begulai enggau bala menyadi kami, taja pan kami sakit sereta napi penanggul ketegal penyakit COVID-19.”

Menyadi Mieko Fujiwara nya seiku menyadi indu ke beumur 70 taun ti diau ba begian Mie di Jepun. Iya tama sepital, tang iya enda ulih ngena internet dalam sepital nya. Nya alai, iya enda ulih begulai enggau eklisia iya ngintu pengawa Ngingatka Pemati Jesus nengah video call. Taja pia, sebedau hari Ngingatka Pemati Jesus, seiku tuai gempuru enggau bini iya datai ngabas lalu nepuka fail video cheramah Ngingatka Pemati Jesus dalam talipun iya. Ketegal tu, Menyadi Mieko ulih meda enggau ningaka charamah nya dalam bilik sepital iya empu.

Ba Zama City, di begian Kanagawa, Menyadi Yuki Takeuchi diau ba endur orang tuai diintu. Umur iya 102 taun. Sebedau hari Ngingatka Pemati Jesus, anak indu iya enggau menantu iya udah dulu nganjung mimit roti ti enda beragi enggau wain ngagai iya. Menyadi Yuki lalu ulih ngintu pengawa Ngingatka Pemati Jesus begulai enggau anak indu sereta menantu iya nengah talipun.

Menantu iya, iya nya, Menyadi Mimura madah: “Mentua aku dibaptisa kena taun 1954, lalu kenyau ari maya nya, iya nadai kala enda ngintu pengawa Ngingatka Pemati Jesus. Taja pan chara kami bejalaika pengawa nya mimit nyelai taun tu, tang iya chukup gaga ati laban agi ulih enggau Ngingatka Pemati Jesus.”

Kitai nemu Jehovah tentu bisi beratika pengeran ati bala penginjil, ti udah tuai umur, ke deka ngintu pengawa Ngingatka Pemati Jesus enggau bantu ari bala tuai gempuru.—Hebrew 6:10.