Taja pan semua dunya tu ditinggang penyakit berampit, kena 7 April 2020, Saksi-Saksi Jehovah di serata dunya ngintu pengawa Ngingatka Pemati Jesus. Baka ke udah dipadah Menyadi Stephen Lett, seiku ari Raban ti Ngiring, “Nadai virus tauka penyakit berampit ti ulih ngurangka asai ati kitai ti beterima kasih ngagai Jehovah enggau Jesus ke semua utai ti udah dikereja seduai iya ngagai kitai, tauka nagang kitai ari ngintu pengawa Makai Malam Tuan.” Baka ni tu diayanka kena taun tu?

Tu meh artikel keterubah dalam siri artikel berita pasal chara bala menyadi Kristian kitai di serata dunya ngintu pengawa Ngingatka Pemati Jesus taja pan napi penanggul bekaul enggau COVID-19. Dalam artikel tu, kitai deka nemu pasal baka ni pengawa tu diintu ba Indu Opis Saksi-Saksi Jehovah sereta Pampang Opis Amerika Serikat.

Nitihka atur ari perintah, ti nagang orang mayuh ari begempuru, Raban ti Ngiring ngaga pemutus, deka bisi siti aja program Ngingatka Pemati Jesus dipejalaika ke semua diri sebilik Betel. Menyadi Anthony Morris ngenataika cheramah iya ba palan besai di Warwick. Semua bala menyadi ke sebagi ari ruang bilik Betel Amerika Serikat bisi peluang meda program ti dipandangka terus dalam bilik sida empu. Taja pan mimit aja orang ke makai roti enggau ngirup wain maya Ngingatka Pemati Jesus, Opis Betel nyediaka roti enggau wain nya ngagai semua dalam ruang bilik Betel.

Semua sida ba Betel mega ulih enggau eklisia sida empu ngintu pengawa tu nengah video call. Pia mega, menyadi Kristian lelaki ke nyadi tuai gempuru ulih milih sekalika deka ngenataika cheramah Ngingatka Pemati Jesus ngagai eklisia sida empu nengah video call.

Mayuh ari sida ba Betel madahka, pengawa Ngingatka Pemati Jesus taun tu, entara kali ngintu pengawa tu ti pemadu spesial ba sida. Taja pan sida enda ulih betemu enggau menyadi sida betunga mua, sida ulih ngasaika penyerakup entara bala menyadi di serata dunya, ti deka belematika pengerindu ti pemadu besai ke udah diayanka Jehovah enggau Anak ti dikesayauka Iya, Jesus Kristus.—John 3:16; Matthew 20:28.