Entara kitai, bisi mayuh bala anak mit sereta nembiak ti keran deka neruska pengawa nginjil sereta meransang bala menyadi maya napi penekul ketegal penyakit berampit.

Ba New Zealand, mayuh orang diatu ngengkahka ayam, anak katun beruang sereta gambar ba jenila sida, ngambika anak mit ke mansa rumah tepedaka nya lalu teperindang. Bala anak mit ba sekeda eklisia ngambi peluang tu kena nginjil, lalu sida ngengkahka gambar David enggau Sophia sereta nulis “Peda aku ba jw.org” ba jenila sida.

Emilia nya seiku anak mit ke beumur semilan taun di Switzerland, lalu iya enda bepengerai. Iya bisi nulis surat ngagai sida ke diau ba rumah orang tuai, alai temuai enda dikemendarka datai ngabas. Emilia nyimpan gambar Noah enggau bandung iya dalam surat nya. Iya lalu madahka sida, sida Noah sebilik likun laban sida diau dalam bandung nya jauh ari orang bukai. Iya meransang sida “diau ba rumah, baka Noah.” Ila, maya penyakit berampit tu abis, Emilia deka ngabas datai semua siku-siku.

Sekeda orang malas surat Emilia, lalu Emilia nulis baru ngagai sida. Seiku penulis berita ba surat khabar ninga pasal cherita Emilia, lalu nulis siti artikel pasal iya ba surat khabar.

Peyton enggau Ella Kempf nya dua iku menyadi indu ke agi biak ba Ontario, Kanada. Sida mengkang rapat enggau bala eklisia sida taja pan napi penanggul ketegal penyakit berampit. Apai seduai iya ke benama Jared nerangka: “Maya kami sebilik belajarka Bup Kudus, anak kami nulung ngaga lis bala kaban kami, lalu kami deka terus berandau enggau tiap iku sida ba lis nya.” Indai seduai iya, Jessica, nambah: “Kami deka ngajar anak indu kami, kami patut nentuka semua bala menyadi Kristian, diri sebilik enggau bala kaban nemu, kami agi ingatka sida.”

Baka nya mega Stella ke beumur semilan taun di Colorado, Amerika Serikat. Iya enggau indai iya deka begulai enggau bala menyadi ke tuai ba eklisia sida. Seduai iya ngaga lis, lalu betalipun ngagai genap iku sida.

Jonathan seduai Sean McKampson, ke diri menyadi beumur 12 enggau 15 taun, sebagi ari eklisia jaku China di Arizona. Ngambika seduai iya neruska pengawa nginjil, tiap pagi sebedau berengkah sekula, seduai iya nulis surat dalam jaku China. Laban sida agi belajarka bansa jaku tu, nya enda senang, sereta begunaka awak ti panjai. Tang sida keran deka bekunsika ajar Bup Kudus enggau orang ke ngena jaku China.

Beberap taun ti udah, enam iku anak mit ke beumur entara 2 sampai 15 taun, enggau tetap ngabas rumah orang tuai di Michigan barat enggau indai sida sereta seiku da agi pengerintis indu. Tang, ketegal coronavirus, baru-baru tu piak ti bekuasa nagang orang luar ari ngabas rumah orang tuai. Diatu, bala anak belagu lagu pasal perintah Petara sereta macha ayat Bup Kudus, ngerikut video, lalu apai indai sida nganjung video ke dirikut nya ngagai sida ke diau ba rumah orang tuai nya. Seiku pekereja ba pusat nya madahka apai sida, seiku orang ke dijaga iya balat tusah ati pengudah meda berita pasal pemayuh orang ke mati ketegal coronavirus. Tang, pengudah iya meda video ke dikirumka sida sebilik, iya berasai lantang ati baru.

Kitai andalka Jehovah amat sayauka bala anak mit ti nunjukka pengerindu ngagai orang, sereta muji Iya nengah pengawa nginjil sida ke dipejalaika enggau pemintar.—Masmur 148:12, 13.