Kot Menua Dzhankoysky, ba Crimea deka madahka pemutus sida kena 5 Mac 2020, bekaul enggau kes Menyadi Sergey Filatov. Piak ke bedawa minta, Menyadi Sergey ditan pengelama tujuh taun ba rumah jil, sereta bisi takat ti terit. Menyadi Sergey, Saksi Jehovah keterubah ke deka diukum ba baruh Undang-Undang Penjenayah di Rusia.

Baka ba berita ke sebedau tu, Menyadi Sergey ditangkap maya Russian Federal Security Service (FSB), datai ngenyit ngagai rumah bala menyadi kitai ba Crimea. Kena 10 Oktober 2017, seraban bala kaban Menyadi Sergey beserumpu ba rumah iya, lalu sida berandau pasal Bup Kudus sereta belaguka lagu pengarap sida. Tang bala FSB tu, belalai ngerikut pengawa sida. Ba taun ke nangkanka nya, kena 16 November 2018, dalam urung 200 iku piak bekuasa datai ngenyit ngagai rumah Saksi Jehovah ba Crimea. Lebih ari 35 iku piak bekuasa nyelungkai rumah Menyadi Sergey, lalu sekeda ari sida bisi bepegaika senyata. Menyadi Sergey ditasat, udah nya dibibaska.

Menyadi Sergey enggau bini iya Natalya, ngembuan empat iku anak. Lalu dua iku ari anak seduai iya agi mit. Diatu, Menyadi Sergey agi nganti pemutus ari kot pasal pemutus kes iya. Kitai besampi ngambi Menyadi Sergey sebilik mengkang bepanggai ba Jehovah, lalu belindung di baruh jaga Iya. Arapka sida seruran andal, Jehovah tentu deka nulung sida napi penguji ti balat tu.—Masmur 46:1.