Maya Ribut Idai nyadi ba pesisir tenggara Afrika kena bulan Mac 2019, pampang opis Malawi, Mozambique, enggau Zimbabwe enggau jampat ngatur 14 iti Komiti Tulung Pengerusak Alam, kena nulung bala Saksi ke dituntung penusah tu. Nyentukka seharitu, bisi 1,434 buah rumah bala menyadi kitai rusak, lalu 650 buah ari nya udah diaduka baru tauka digaga baru. Ari 29 buah Palan Gempuru ke rusak, bisi 8 buah ari nya udah digaga baru, lalu 10 buah da agi diaduka baru.

Dalam urung semilan bulan tu, lebih ari 3,500 iku bala menyadi enggau pengawa nulung ba tiga iti menua ke ditinggang penusah tu. Sekeda ari menyadi kitai ke sukarela, sanggup datai ari endur ti jauh ketegal deka meri tulung. Sida datai ari menua Afrika nya empu, pia mega ari Brazil, Perancis, Itali, enggau Amerika Serikat. Bala menyadi ari menua nya empu mega dilatih ba pengawa nirika bengunan. Ngambika chunto, ba pengawa nusun bata, tauka tukang kayu.

Ba Mozambique, pengudah Ribut Idai nyadi ba Manica enggau Sofala, kira-kira 70 persen utai tanam bala menyadi kitai rusak. Nya alai, pampang opis ngasuh bala ke meri bantu nya nyediaka dalam urung 430 tan pemakai ngagai sida. Tu nyengkaum pemakai ke suah diempa orang dia empu, baka tepung maizena, mayuh bengkah kachang, minyak, garam, enggau gula. Sida mega nganjung 5 tan leka utai tanam ngambika ulih betanamka baru pun kayu baka tomato, jagung, sereta betanamka padi.

Dijangka, projek ba pampang opis Malawi deka tembu kena bulan Februari 2020. Pia mega projek ba Mozambique engka tembu kena bulan Januari 2020, lalu projek ba Zimbabwe udah tembu kena bulan September 2019. Penyampau ungkus ke dikena ba projek tu dijangka 4 juta dolar Amerika.

Seiku ari menyadi ke gawa ba begian Komiti Pampang Opis iya nya Trent Edson, mega nulung ba begian Komiti Tulung Pengerusak Alam madahka, “Bala menyadi ke tinggang penusah tu berasai gaga lebuh rumah sida didirika baru. Pengibuh ke diayanka bala menyadi ari menua tu empu, tauka sida ke datai ari jauh, amat negu ati aku. Mayuh ari sida enggau naka ulih deka meri tulung.”

Pengerindu ba entara bala menyadi amat nyata dipeda maya penusah ke baka tu nyadi. Tu tentu meransang semua kitai, sereta lebih ari 10,000 iku menyadi kitai ke kena penusah tu, beterima kasih ngagai Jehovah.—Jaku Dalam 17:17.