Penyakit coronavirus (COVID-19) udah ngubah pengidup bejuta iku Saksi-Saksi Jehovah. Sida bebendar deka nitihka atur ke diberi piak ti bekuasa, lalu ba maya ti sama, neruska sembah sida. Ba menua ke balat dituntung virus tu, bala menyadi kitai ngayanka pemintar ngiga chara nginjil ti baru.

Seiku Menyadi Kristian lelaki di Pisa, Itali madahka: “Kami amat mujur nginjil! Ketegal mayuh orang nadai nginsit ari rumah, kami duai bini aku ngiga lumur telefon orang ke dikelala kami lalu betalipun ngagai sida ngena video call. Kami ulih nginjil bejam-jam ngena talipun, berandau enggau pemelajar Bup Kudus, orang ke kala diabas kami, orang ke baru ditemu enggau orang ke lama dikelala. Kami udah bulih asil ti manah.”

Di Korea Selatan, diatu mayuh penginjil suah agi ngena laman web kami jw.org enggau aplikasi JW Library. Ngambika chunto, seiku Menyadi Kristian lelaki nerima mesej ke enda disadang ari seiku orang ke kala belajar Bup Kudus enggau iya. Orang nya udah tiga taun badu belajar Bup Kudus, tang iya madah, penusah penyakit berampit tu ngasuh iya berundingka utai ti disebut dalam Bup Kudus pasal hari ti penudi. Menyadi lelaki nya ngena “kunsi link” ba aplikasi JW Library ngambika nganjung penerang ti engkeman ngagai pemelajar nya nengah SMS. Menyadi lelaki nya madahka iya, “diperansang laban bukti ti nunjukka kitai idup ba hari ti penudi nyau udah majak ngasuh orang deka nemu agi pasal Petara enggau Bup Kudus.”

Pemayuh riput ke datai ari sereta dunya nunjukka bala menyadi Kristian kitai ngumbai pengawa nginjil nya amat berega ba sida. Manah amat meda bala menyadi kitai ngayanka ‘pemintar’ ngambika ulih terus bekunsika Berita Manah.—Mikah 6:9.