Kena 4 Ogos 2021, nya meh ulang taun ke-75 konvensyen entarabansa besai ti keterubah ti diatur Saksi-Saksi Jehovah. Tajuk konvensyen besai nya “Bansa ti Gaga Ati.” Konvensyen nya dipejalaika entara 4-11 Ogos 1946, ba sebuah stadium enggau sebuah palan di Cleveland, Ohio, Amerika Serikat.

Bala menyadi ngatur konvensyen tu sepengudah perang dunya kedua. Konvensyen nya jauh bida ari perang ti mai pechah-belah sereta pemerinsa ba serata dunya. Beribu iku bala menyadi ari serata dunya begulai enggau manah ba konvensyen nya. Maya nya, mayuh endur di Amerika Serikat, orang ke bekulit chelum enda dikemendarka begulai enggau orang putih. Tang ba konvensyen nya, orang ari mayuh macham bansa enggau tikas sosial begulai manah enggau pangan diri.

Konvensyen nya meh keterubah kali bisi 80,000 iku Saksi ti begulai ba siti endur. Ketegal perang, sida enda entu ulih begulai enggau pangan diri. Tang maya konvensyen nya sida gaga ati ulih betemu enggau bala menyadi. Ba konvensyen nya bisi 302 iku temuai ari 32 iti menua. Menyadi Nathan H. Knorr meri cheramah ti betajuk “Raja Pemaik” ba hari ti penudi konvensyen nya.

Taja pan bisi penanggul, atur konvensyen nya mujur magang. Ba hari ti keterubah lebuh konvensyen nya berengkah, bala menyadi ke ngatur napi penanggul ti besai. Pemayuh orang ke datai mayuh agi ari bangku ba palan nya. Bala menyadi ke ngatur mutus deka ngena stadium ke semak enggau palan nya ngambika bisi chukup penuduk ke semua orang. Endur nya patut disediaka sebedau sesi malam berengkah kena 7:45 malam. Penanggul iya, bisi dua iti game besbul ke udah diatur ba stadium nya nyentukka 6:30 lemai.

Lebuh game ti kedua, bisi ribut datai ti ngasuh orang pulai tumu. Pengudah ribut ngetu, 50,000 iku Saksi sempat tama ke stadium nya sebedau sesi malam berengkah.

Ba konvensyen nya, siti majalah Awake! (Peratika!) enggau bup “Let God Be True” dikeluarka. Pia mega, Menyadi Knorr madahka pelan kena ngeluaska endur nyelak ba Brooklyn, New York, Amerika Serikat, enggau pampang opis ba enam iti menua bukai.

Maya ti amat ngagaka ati nya, bisi 2,602 iku orang dibaptisa ba Danau Erie. Tu nyengkaum 903 iku menyadi lelaki enggau 1,699 iku menyadi indu. Bisi agi utai ti spesial baka chunto belajarka Menara Jaga, enggau chunto Sekula Kereja Teokratik, sereta 160 iku penebah perengka musik.

Konvensyen tu nyadika chunto ngagai konvensyen ke deka datai. Ngambika chunto, bisi sekeda begian konvensyen ditumbuhka. Tu nyengkaum Atendan, Opis Chairman, Kutak Ubat, Begian Masang Utai sereta Lenyau enggau Temu.

Menyadi Ron Little nya seiku tuai gempuru ba Eklisia McKeesport di Pennsylvania, Amerika Serikat. Lebuh iya beumur 11 taun, iya datai ngagai konvensyen sama enggau apai sereta menyadi lelaki iya. Tiap malam konvensyen nya, sida tiga tinduk ba trak apai sida. Tu nyadi pengelama lapan hari.

Menyadi Little agi ingat lebuh majalah Awake! dikeluarka. Ku iya ngenang baru: “Lebuh Awake! dikeluarka, kami belanda kin kia mandangka majalah nya. Enti orang nadai majalah nya, semua kami nguji nyadung majalah ngagai iya.

Menyadi Little, ke diatu beumur 86 taun, ngenang baru pengalit ati iya meda mayuh amat Saksi begempuru ba siti endur. Ku iya: “Lebuh maya nya aku enggai konvensyen nya abis. Nya amat ngerinduka ati.”

Kitai amat beterima kasih ke konvensyen kitai ke nyadika berekat ari Jehovah.—Adat Lewi 23:2.