Pampang opis Saksi-Saksi Jehovah deka terus mantau pasal virus corona tauka mega dikumbai Covid-19. Dalam Bup Kudus, endang sigi udah nangkan kitai pasal wabak penyakit ba hari ti penudi. (Luke 21:11) Lebuh bisi virus ke baka tu nyadi, kitai patut nemu chara nyaga diri sereta orang bukai.—Jaku Dalam 22:3.

Kitai engka nemu berita pasal bala menyadi kitai ke ba endur kena virus corona tu. Ketegal virus tu balat ngerampit ba menua Itali, Jepun, Korea Selatan sereta ba sekeda menua, nya alai, bisi entara pampang opis sereta eklisia ba menua tu patut ngaga ubah. Indah, bisi sekeda ari pampang opis nya enda ulih dilawa temuai. Bisi mega patut nginsil pengawa Gempuru Besai, laban pemerintah dunya enda ngemendarka rayat sida beserumpu begulai enggau mayuh orang. Atur nginjil sereta gempuru ba sekeda eklisia mega bisi ubah nitihka chara ti ngena. Taja pan utai ke nyadi tu engka ngachau kitai, tang bala menyadi tetap macha sereta belajarka Bup Kudus, lalu ngeringka pangan diri.—Jude 20, 21.

Ketegal utai ke nyadi tu engka ngasuh kitai irau. Bisi sekeda atur ba baruh amat manah ke semua kitai. Atur tu amat beguna ba nuan empu sereta ruang bilik nuan.

• Anang Kelalu Irau. Amat, kitai patut bejimat ngambi enda kena rampit. Tang, kitai enda patut kelalu irau.—Proverbs 14:15; Isaiah 30:15.

• Titihka Atur tauka Undang-Undang Menua. Kesuah iya, pemerintah tentu bisi atur kena nyaga rayat iya. Nya alai, kitai patut nemu tiap kali bisi atur ari sida, lalu titihka meh.—Rome 13:1.

• Nyaga Pemeresi. Suah agi nuchi jari enggau ai sereta sabun, tauka utai ti ulih kena munuh kuman (hand sanitizer). Tu atur ti amat beguna. Ba rumah tauka ba Palan Gempuru, tentuka utai sereta endur ke suah ditegu seruran beresi. Nambahka nya, nitihka lalau ari bala doktor, enti ulih kitai nyeliahka diri ari betabi jari enggau pangan diri, ngambi ulih ngurangka penyakit tu ari berampit. Kena napi virus corona, Gerempung Opis Pengerai ba Serata Dunya bisi madahka sekeda chara ngagai orang mayuh.

• Rinduka Semua Orang. Datai gempuru sereta nginjil ngagai orang endang sigi pengawa ti amat beguna. Tang, enti kitai sakit, manah agi kitai belelak ba rumah. Tu ulih nyeliahka penyakit kitai ngerampit orang bukai. Enggau chara nya, kitai nunjukka diri, rinduka orang bukai.—Matthew 22:39.

• Titihka Atur Eklisia. Ba sekeda endur ke bisi virus corona, pampang opis mutuska nadai gempuru tauka sebarang pengawa ke bekaul enggau pengarap. Nya meh utai ke nyadi ba menua ke balat kena virus corona, baka ba Itali, Jepun, enggau Korea Selatan. Nitihka chara ti ngena, bala tuai gempuru engka nyediaka rikut gempuru, ti ulih dipeda bala menyadi ba rumah sida empu. Pia mega, bala penginjil agi ulih nginjil enggau chara betalipun, mesej, tauka nengah surat.

Ba ditu, bisi beberapa iti artikel ke ulih nulung kitai nyaga diri ari penyakit.

• “Lindungi Diri dari Penyakit” Sadarlah! No. 6 2016, halaman 4-6

• “Cara agar Lebih Sehat” Sadarlah! Juni 2015, halaman 2-7

• “Anda Bisa Lebih Sehat: Kiat 4—Lindungi Kesehatan Anda” Sedarlah! Maret 2011, halaman 7