4 MEI 2020
SIERRA LEONE
Bup Kudus Salin Dunya Baru Jaku Gerika Dalam Bansa Jaku Krio
Program Ngeluarka Salin Bup Kudus Tu Dipandangka ba TV sereta Radio di Sierra Leone
Lebih ari 2,000 iku penginjil ti ngena bansa jaku Krio ba Sierra Leone chukup gaga ati lebuh Bup Kudus Salin Dunya Baru Jaku Gerika dikeluarka dalam bansa jaku Krio kena 26 April 2020.
Ketegal perintah menua nagang orang ari begempuru kena nyaga ari penyakit berampit, bala menyadi kitai dia enda ulih begempuru ke pengawa ti spesial tu. Pia mega, ketegal mayuh penginjil di Sierra Leone kelebih agi sida ke diau ba bandar ti mit nadai perengka elektronik, sida enda ulih meda program nya enti dipandangka terus ngena video call.
Menyadi Alfred Gunn, seiku ari Komiti Pampang Opis Liberia ngeluarka Salin Dunya Baru Jaku Gerika dalam bansa jaku Krio
Nya alai, Komiti Pampang Opis Liberia ti ngemataka pengawa Saksi-Saksi Jehovah di Sierra Leone minta pemendar ari Komiti Ngajar ari Raban ti Ngiring, ngeluarka salin Bup Kudus tu enggau siti program ti pandak. Bala penginjil lalu diasuh ningaka program ti spesial tu ba radio tauka TV. Tang, sida enda nemu pasal salin Bup Kudus ke deka dikeluarka.
Beberapa hari sebedau program nya, genap iku penginjil nerima siti Bup Kudus ke disimpan dalam sampul surat ti dianjung ngagai rumah sida empu. Bisi jaku ajar ti ditulis ba luar sampul surat nya ke madahka, anang muka iya nyentukka pengudah program ti spesial.
Sepengudah abis program nya, Menyadi Megan Diaz, ke udah pindah ngagai Sierra Leone kena meri bantu ba pengawa nginjil, madahka: “Pemelajar Bup Kudus aku betalipun ngagai aku, lalu madahka iya udah ngambi awak ningaka cheramah nya, lalu iya amat gaga ati laban Jehovah nyediaka salin Bup Kudus tu! Pagila kami duai deka ngena salin baru tu maya belajarka Bup Kudus.”
Tounkara nya seiku pemelajar Bup Kudus ti ngena jaku Krio. Ku iya: “Salin Bup Kudus ti baru tu nyadika bukti Jehovah amat deka genap iku orang nerima pesan iya, ukai semina kena belajar, tang amat meretika iya, nyentukka sida senang deka ngajar pesan nya ngagai anak sida. Aku amat gaga ati nerima salin Bup Kudus dalam bansa jaku kami empu!”
Bansa jaku Krio mimit sebaka enggau jaku English, ti dikena mayuh orang ba Sierra Leone. Empat iku orang bekereja ba projek nyalin Bup Kudus Jaku Gerika tu pengelama dua setengah taun. Kenyau ari 27 April, salin baru tu ulih didownload ari jw.org.
Baka bala menyadi kitai di Sierra Leone, kitai semua bela beterima kasih ke salin Bup Kudus Jaku Gerika ti baru dalam bansa jaku Krio. Nya mega siti ari “pemeri ti menyana, ti pemadu badas” ari Apai kitai di serega, Jehovah.—James 1:17.
Nuan Engka Rindu Meda Tu
UTAI KE SUAH DITANYA
Kati Saksi-Saksi Jehovah Ngembuan Bup Kudus ti Enda Sama enggau Orang Bukai?
Ngena mayuh bengkah salin Bup Kudus ulih ngemanahka agi penemu nuan pasal Bup Kudus. Bisi tiga iti poin ke nerangka pemanah Bup Kudus Salin Dunya Baru, lalu nya amat beguna lebuh nuan belajarka Bup Kudus.