Kena 20 ngagai 21 Julai 2019, konvensyen pelilih menua keterubah iya ba bansa jaku Rome diatur ba stadium Winter di Michalovce. Penyampau orang ke datai ngagai konvensyen nya 1,276 iku orang, lalu bisi 19 iku orang dibaptisa.

Konvensyen tu mega bisi ngelaluka bala menyadi ke datai ari menua bukai baka, Belgium, Republik Czech, Great Britain, enggau Ukraine. Siti ari utai ke ngerinduka ati ngagai semua ke datai iya nya, cherita konvensyen nya bisi disalin dalam bansa jaku sida empu, ke betajuk Cherita Josia: Rinduka Jehovah Lalu Begedika Utai ti Jai.

Konvensyen tu diatur pengudah lima taun eklisia dalam bansa jaku Rome keterubah iya ditumbuhka, ba Slovakia kena November 2014. Diatu, udah bisi 9 iti eklisia, 10 iti raban, enggau 14 iti raban ba endur ke baru ngena bansa jaku Rome endur Czech-Slovak.

Peter Tirpak, manager stadium endur kitai ngatur konvensyen nya madah, “Kerejasama ke diberi bala Saksi-Saksi Jehovah amat manah. Kita enda bulaka semaya. Kami amat gaga nerima penatai kita baru ba maya bukai.”

Peter Varga, tuai ke ngemataka program konvensyen nya madah, “Aku enda kala meda konvensyen ke baka tu. Ngagai semua bala menyadi kitai ke ngena bansa jaku Rome, tu pengawa besejarah ti amat ngerinduka ati. Pengudah abis belagu, sida beberap enggau pangan diri, taja pan sida bedau ngelala pangan diri. Ulih dipeda mayuh ari sida mansutka ai mata.”

Kitai sama gaga ati enggau 1,010 iku penginjil ke ngena bansa jaku Rome ba Slovakia. Ari semua konvensyen tu, kitai ulih meda enggau terang nembiak Jehovah ngembuan pengerindu ti bendar ngagai pangan diri.—John 13:34, 35.