Kena 18 Disember 2021, Bup Kudus Salin Dunya Baru ke diaduka baru dikeluarka dalam bansa jaku Slovenia. Menyadi Gerrit Lösch ari Raban ti Ngiring ngeluarka salin baru tu nengah program ti spesial ke dirikut dulu lalu dipandangka terus ngagai kira-kira 2,000 iku orang. Bup Kudus tu dikeluarka dalam fail bansa digital, lalu kena taun 2022 iya deka dichelak.

Bup Kudus udah disalin ngagai bansa jaku Slovenia kenyau ari taun 1584. Nya meh maya Bup Kudus Dalmatin, iya nya Bup Kudus ti keterubah dalam bansa jaku Slovenia, dikeluarka. Kemayaharitu, semina bisi 80 iti salin Bup Kudus Dalmatin ke agi tinggal, nyengkaum siti ke bisi ba muzium Bup Kudus ba indu opis Saksi-Saksi Jehovah di Warwick, New York, Amerika Serikat.

Kena taun 1925, Menyadi Franz Brand, seiku Nembiak Bup Kudus Entarabansa, berengkah nginjil ba endur iya gawa, iya nya siti kedai guntin buk ba Maribor, Slovenia. Kena taun ti sama, siti raban ti mit belabuh begempuru enggau bejarit ngambika berandauka Bup Kudus. Kena taun 1930, bala Nembiak Bup Kudus ba Slovenia numbuhka siti opis alai sida ulih ngemataka pengawa ngajar Bup Kudus di serata menua nya. Ba taun 2009, Menyadi Samuel Herd, seiku ari Raban ti Ngiring, ngeluarka Bup Kudus Salin Dunya Baru jaku Slovenia ba konvensyen pelilih menua di Ljubljana, Slovenia.

Maya Perang Dunya Kedua enggau dalam beberapa taun pengudah nya, Saksi-Saksi Jehovah ba Slovenia balat amat disakal. Keterubah iya, sida disakal bala Nazi, lalu pengudah nya, disakal piak bekuasa ba menua nya. Lebuh maya nya, mayuh menyadi lelaki dijil, indah bisi sekeda ke dibunuh. Kena taun 1953, situasi sida berinsur manah laban piak bekuasa badu agi nagang Saksi-Saksi Jehovah lalu ngemendarka sida bejalaika pengawa sembah sida enggau bibas. Kemayaharitu bisi 1,757 iku penginjil ba Slovenia.

Tentu bala menyadi ba Slovenia setuju enggau utai ke dipadah Menyadi Gerrit Lösch maya iya ngeluarka Bup Kudus tu. Ku iya: “Belajarka meh Bup Kudus ti baru tu ngambika nuan landik ngajar iya ngagai orang bukai lalu mancharka kuasa iya! . . . Bup Kudus Salin Dunya Baru [ke diaduka baru] dalam bansa jaku Slovenia deka nulung kita ‘bepegai teguh ba pesan ti tau dikarapka’!”—Titus 1:9.