Kena 1 April 2020, Kot Soldadu di Dushanbe, iya nya indu nengeri di Tajikistan, deka madahka pemutus pasal kes Menyadi Jovidon Bobojonov. Iya dituduh laban enggai nyadi soldadu ketegal pengarap iya. Pengelama lima bulan Menyadi Bobojonov udah merinsa laban ditan nganti maya kes iya deka dipechara.

Kena 4 Oktober 2019, pemesai soldadu di nengeri Khujand nabanka Menyadi Bobojonov, ke beumur 19 taun. Iya ditaban ngenyit ari rumah iya lalu dibai ngagai opis ngerejista soldadu alai iya ditan. Dua hari udah nya, iya dipejal nepan kerita api ke nuju ngagai pusat latih soldadu di pelilih Lenin. Pengudah nya, iya dianjung ngagai unit soldadu ke belumur 45075 lalu ba dia, bala pemesai nguji ngansak iya ngerasukka baju soldadu lalu besumpah nyadi soldadu ti tetap ati. Kena 28 Januari 2020 nya baru Menyadi Bobojonov dituduh ngereja penyalah.

Apai indai Jovidon mega Saksi-Saksi Jehovah lalu sida udah ngeriput kes tu ngagai piak ti bekuasa ti Tajikistan, nyengkaum Opis Presiden enggau pemesai ke mutarka kes ke diriput orang. Piak ti bekuasa di Tajikistan madahka Menyadi Bobojonov endang besalah sereta patut ditabanka lalu ditan. Tu ketegal nadai undang-undang di Tajikistan ti ngemendarka orang ke enggai nyadi soldadu milih ngereja pengawa sivil ari ke nyadi soldadu.

Kitai nemu Jehovah endang deka ngupah Menyadi Bobojonov ketegal pemerani iya, lalu meri pemaik enggau pengering ngagai iya enggau sida sebilik.—Masmur 29:11.