Enda lama da agi a, kot soldadu ba Tajikistan deka madahka pemutus pasal kes Menyadi Rustamjon Norov. Iya engka deka dijil entara dua ngagai lima taun ketegal iya enggai nyadi soldadu. Iya udah ditan kenyau ari 1 Oktober 2020.

Rustamjon Norov

• Ada: 1998 (Dushanbe)

• Biograpi: Kena ngidupka diri enggau diri sebilik, iya gawa nyeruri apartment sereta ngaduka perengka rumah. Iya rindu main bul

• Iya dibaptisa kena taun 2016, lebuh iya beumur 17 taun. Ruang bilik iya ba eklisia ke ngena bansa jaku Rusia. Dua taun pengudah iya dibaptisa, iya mindah ngagai eklisia bansa jaku Tajiki, nulung orang ngena bansa jaku nya belajarka Bup Kudus

Kena taun 2016, Menyadi Rustamjon Norov mansang ngagai opis alai ngerejista soldadu. Iya nerangka diri deka mengkang neutral lalu minta diri diberi pengawa bukai ke ukai bekaul enggau pengawa soldadu. Setaun udah bekau nya, iya ngereja utai ti sama baru. Komandant kedua ba opis nya bebasaka pemutus Menyadi Rustamjon, sereta chara iya nerangka runding diri. Dalam tiga taun udah bekau nya, Menyadi Rustamjon nadai agi dikangau nyadi soldadu.

Tang, kena 24 September 2020, Menyadi Rustamjon dikangau ke opis ngerejista soldadu ti ngemataka pelilih menua nya. Bala pegawai nasat iya pengelama tiga jam, lalu mutuska nadai utai nagang iya ari nyadi soldadu. Udah nya, sida nguji mejal iya diperesa lutur. Apai Menyadi Rustamjon meda utai ke nyadi, lalu minta bala pegawai nya nejuka kes tu diperesa opis penawa.

Kena 1 Oktober 2020, Menyadi Rustamjon enggau apai iya ngagai ke opis penawa. Dia, penawa nya ngasuh seiku pegawai polis mai seduai iya ke opis ngerejista soldadu ti ngemataka pelilih menua. Lebuh sangkai dia, apai Menyadi Rustamjon enda dikemendarka tama seretai enggau anak iya. Menyadi Rustamjon lalu ditan pengelama dua hari, taja pan iya bedau dituduh ngereja pengawa jenayah. Sekumbang iya ditan dia, iya ditagang ari berandau enggau luyar iya.

Kena 3 Oktober 2020, Menyadi Rustamjon dianjung ngagai unit soldadu ba nengeri Khujand enggau penyauh 300 kilometer (186 batu) ari ruang bilik iya ba Dushanbe. Dalam dua hari pengudah nya, iya dipindah beberapa kali ngagai unit soldadu ke bukai ba Khujand.

Kena 6 Oktober 2020, baru iya Menyadi Rustamjon dikemendarka betalipun ngagai ruang bilik iya sereta betemu enggau luyar iya. Tang, kena 17 Oktober 2020, kot soldadu mutuska Menyadi Rustamjon deka ditan nyentukka kes iya dipechara. Iya deka mengkang ditan dia seagi piak bedawa mansik kes iya lalu kot ngaga pemutus. Menyadi Rustamjon dituduh ngubah riput pengerai iya, ngambika nyeliahka diri ari diasuh nyadi soldadu.

Taja pan Menyadi Rustamjon ditan, iya enda lemi semengat, lalu iya andalka Jehovah enggau pengabis ati. Iya beterima kasih ngagai Jehovah, ti udah ngelatih iya sereta nulung iya ngemansangka pemerani enggau pengarap ke diguna iya kena napi penguji tu. Iya mega beterima kasih laban iya kala diuji enggau enda disadang kena taun 2013, lalu penguji nya pan udah nulung nyikap iya. Maya nya, Menyadi Rustamjon enggau madi iya Ravshan, ditaban pegawai piak ti bekuasa ari sekula sida ngagai opis ngerejista soldadu, lalu dia sida diperesa lutur. Lebuh maya nya, Rustamjon udah nyadi penginjil ke bedau dibaptisa, tang umur iya semina 15 taun aja. Iya kelalu biak dikangau nyadi soldadu ba Tajikistan. Pengudah nya, apai seduai iya, Batyr, meri mayuh agi awak lebuh belajarka Bup Kudus enggau diri sebilik kena nulung nyikapka anak lelaki iya ngetanka pengarap sida sereta mengkang neutral. Batyr suah belakunka seiku pegawai soldadu, lalu ngasuh anak lelaki iya belatih chara sida deka nyaut tanya pasal pengarap sida.

Ku Rustamjon nerangka: “Sebedau kami belatih, aku ngumbai diri udah besedia deka ngetanka pengarap aku. Tang lebuh kami belakun, aku tekenyit laban kebendar iya, aku amat kesal ati sereta takut. Nya ngasuh aku sedar, aku patut suah agi besampi pasal pengarap aku ngagai Jehovah, sereta belajar mayuh agi pasal kebuah aku deka mengkang neutral. Belubah-lubah, penakut aku lenyau. Ba pun taun 2016 aku mutuska nyerahka diri ngagai Jehovah lalu dibaptisa.”

Rustamjon mega bulih peransang ari bala menyadi lelaki ke tuai agi sereta bepenelaba, ke udah dijil ketegal pengarap sida. Ku iya madah: “Aku nemu, enti aku mengkang neutral, aku deka napi mayuh penusah. Tang enti aku dijil, aku ngumbai nya siti basa ti besai, laban aku ulih nguduska sereta ngetanka nama Jehovah ba ‘kandang alai nginjil ti baru.’”

Apai Rustamjon nerangka: “Kami sebilik beterima kasih ngagai Jehovah laban Iya meri kami basa ti besai, iya nya, kami ulih dikena Iya ngereja peneka Iya. Kami deka madah ngagai semua bala menyadi kami; ‘kami ulih ngasaika pengerindu kita, sukung ari kita ba emosi sereta ba pengarap, enggau sampi kita ke ngarika kami.’ Kami enda irau. Pemaik ke diberi Petara bisi dalam ati kami, baka ke udah disemaya Jehovah dalam Bup Kudus!”—Pilipi 4:6, 7.