Baka ke dipadah ba riput sebedau tu, kena 21 September 2021, Menyadi Rustamjon Norov, ke diatu udah beumur 22 taun, dibibaska tumu ari jil ba Tajikistan ketegal bisi undang-undang ti baru berengkah ari pun bulan September. Iya ditan pengelama tiga bulan sebedau dipechara. Kena 10 Mei 2021, iya dipindahka ngagai rumah jil di Yavan alai iya neruska ukum jil pengelama tiga taun setengah. Sekumbang iya ditan sereta dipechara, orang ke meratika Rustamjon amat alit ati enggau ulah ti manah sereta penetap ati iya.

Bisi sekali, lebuh kes Rustamjon benung dipechara, seiku komandant mansang lalu betabi jari enggau iya. Komandant nya madahka diri amat bebasaka Rustamjon ke pemerani sereta penegap pengarap iya. Udah nya, ku iya madah: “Semua orang ke arapka Petara patut baka nuan.” Ku iya nambah: “Uji gambarka ila, lebuh menua Tajikistan ngemendarka orang ngereja pengawa bukai kelimpah ari nyadi soldadu, nuan deka dikira seiku ari sida ke ngetanka hak rayat ba menua tu.”

Lebuh ba jil, Rustamjon terus meri Saksi ti manah ngagai orang bukai. Ketegal ulah iya ti manah, pegawai jil mai iya nerima latih nengah kursus ke diatur European Union. Kursus tu nulung orang ke dijil ngiga kereja ti manah pengudah sida dilepaska. Pengudah kursus iya tembu, piak jil meri iya setipikit enggau surat terima kasih ketegal ulah iya ti bagas. Piak bekuasa ngaku Rustamjon ngembuan ulah ti manah ketegal iya nitihka prinsip Bup Kudus.

Sebedau iya dibibaska ari jil, Rustamjon enda nemu enti undang-undang ti baru nya ulih ngubah situasi iya. Taja pia, orang ke dijil enggau iya pechaya iya deka dibibaska ketegal ulah iya ti manah ba jil. Pegawai jil mega meri jaku peransang ngagai iya.

Bala Saksi ke biak ke dijil ketegal mengkang neutral sereta tetap ati, baka Rustamjon, ‘ngawakka penampak sida manchar ngagai orang.’ Ke berat agi, “pemadas pengawa” sida mai puji sereta basa ngagai Petara Jehovah.—Matthew 5:16.