Pengudah dilepaska ari rumah jil kena 1 November 2020, Menyadi Jovidon Bobojonov ngenang, “Jehovah udah nulung aku mengkang tegap ba pengarap.” Sehari sebedau nya, President menua Tajikistan nginsil ukum ke diberi ngagai Jovidon enggau 377 iku orang jil ke bukai. Jovidon udah dijil pengelama semilan bulan. Ketegal enggai nyadi soldadu, iya kala diberi ukum jil pengelama dua taun.

Kena 4 Oktober 2019, pegawai soldadu nabanka Jovidon ari rumah iya lalu ngetanka iya dalam opis ngerejista soldadu. Umur iya maya nya semina 19 taun aja. Dalam beberapa bulan pengudah nya, iya dipindahka ngagai mayuh bengkah unit soldadu. Tiap kali iya dipindah ngagai endur alai orang tangkap ditan sementara (ke dikumbai TDF), iya dipejal nerangka kebuah iya enggai nyadi soldadu. Jovidon nerangka: “Mayuh komandant enggau soldadu nanya aku mayuh tanya ti beli, lalu arapka aku deka ngelengkaka pengarap aku. Sida deka ngena tanya ti nadai logik nya, laban deka nyungkak aku ringat. Kekadang sida ngerak aku dalam urung tengah malam kena nandu nanya aku tanya ti sama, sereta ngansak aku madahka kebuah aku enggai nyadi soldadu.”

“Taja pia, aku ngasaika sampi amat nulung aku. Lebuh aku dikurung dalam unit soldadu, aku enda ngetu-ngetu besampi siang malam. Aku bebendar besampi nyentukka ai mata labuh, minta Jehovah nulung aku ngambika enda putus pengarap tauka ngasaka ati iya, pia mega ngambika ulih nagang diri ari nyaut sida enggau kasar lebuh sida nguji ngeringatka aku.”

“Jehovah baka ke megai jari aku enggau rat . . . Kekadang aku berasai balat tusah ati laban sunyi. Tang Jehovah ngeringka aku nengah utai ti ditempa Iya. Ninting pagi aku dani lalu ningaka burung enchiap enggau belagu. Kena malam hari, aku merening ngagai bulan enggau bintang. Pemeri ari Jehovah baka tu ngagaka ati aku sereta meransang aku.”

Kena 2 April 2020, Jovidon dikumbai kot besalah lalu ditaban ari TDF ngagai rumah jil. Iya enda dikemendarka nerima surat ari luar. Taja pia, bala menyadi ke diau semak endur iya dijil suah nganjung pemakai ngagai iya, lalu sida nulis ayat Bup Kudus ninting hari ba plastik alai pemakai nya diengkah. Iya nerangka, “Tu nulung aku muai asai ati ti puang, sereta ngingatka aku pasal bala kaban aku ti rinduka aku.”

Jovidon mega amat gaga ati laban ulih ingatka ayat Bup Kudus ti meransang, nyengkaum Rome 8:37-39. Iya nerangka: “Lebuh aku dijil aku baru nemu pengamat jaku ba ayat nya. Nadai siti pan penguji ke ditapi aku, ulih ngenyauhka aku ari pengerindu Jehovah. Jehovah nulung aku mengkang tegap ba pengarap.”

Utai ke diasaika Jovidon pan meransang apai indai iya. Apai iya, Abdujamol madahka: “Pengarap kami empu dikeringka ulih sampi, sereta belematika teladan anak kami ke mengkang tetap ati ngagai Jehovah sekumbang penguji tu. Semua bala menyadi kami di serata dunya endang nyukung kami mega. Kami beterima kasih ngagai sida ke besampi ngarika kami. Kami beterima kasih ngagai Jehovah laban udah meri kami kaban ti bepengerindu.”

Ketegal diau ba hari ti penudi, kitai nyangka deka ditinggang “pemerinsa ti balat.” (1 Peter 4:12) Nya kebuah Jovidon nerangka: “Laban aku baru diatu bibas, aku ka ngena peluang tu ngenalamka penemu aku pasal Jehovah, sereta nyikap diri deka napi penguji dudi hari. Pesan aku ngagai bala menyadi ke bedau kala napi penguji ti balat iya nya, kita enda tau enda ngena pengelepas kita ke diatu ngenalamka penemu pasal Jehovah enggau chara macha Bup Kudus sereta litaricha kitai.”