Kena 1 Januari 2022, nyadika ulang taun ke-75 edisi keterubah Menara Jaga dalam jaku Thailand dikeluarka.

Kena taun 1931, Berita Manah pasal Perintah Petara berengkah dikerembaika ba menua Thailand. Lebuh bala menyadi baru berengkah nginjil ba menua Thailand, sida nyadung beribu iti litaricha dalam jaku China, English enggau Jepun. Maya nya, kengka litaricha ke udah disalin ngagai jaku Thailand iya nya bup mit Protection.

Bisi tiga iku pengerintis ke lelaki ari menua bukai ke nginjil ba menua Thailand maya nya. Sida nyau sedar, enti pesan ke ditusui sida deka negu ati orang ba Thailand, sida begunaka mayuh agi litaricha dalam bansa jaku nya. Menyadi Willi Unglaube nulis ngagai Menyadi Rutherford lalu minta tulung. Menyadi Rutherford malas surat nya lalu madah: “Arapka Jehovah lalu bagas gawa, nuan deka tetemuka seiku penyalin.”

Kena Disember 1939, Menyadi Kurt Gruber enggau Willi Unglaube nginjil ba utara Thailand. Chomchai Inthaphan, ke nyadi guru besar ba sekula Presbyterian Girls’ School di Chiang Mai tetemuka siti litaricha ke udah disadung dua iku menyadi lelaki nya dalam bansa jaku English. Chomchai pandai jaku English enggau Thailand, lalu iya sedar iya udah tetemuka pemendar ari Bup Kudus.

Enda lama udah nya, iya badu gawa ba sekula nya lalu muai diri ari gerija iya, taja pan mayuh orang nyakal iya, lalu sekula nya pan madahka deka meri iya mayuh duit enti iya enda ninggalka sekula nya. Udah nya, iya dibaptisa nyadi seiku ari Saksi-Saksi Jehovah. Litaricha ti keterubah ke disalin iya, iya nya bup Salvation. Nyau kelama, Chomchai nyadi seiku entara orang ti keterubah gawa ba Betel di Bangkok, lalu dalam betaun-taun iya kengka penyalin ke nyalin litaricha ngagai jaku Thailand. Nyau kelama bisi beberapa iku indu bebansa Thailand ke belajarka pemendar lalu layak nulung ba pengawa nyalin.

Lebuh Perang Dunya Kedua berengkah, pengawa nyalin litaricha ngagai jaku Thailand diketuka enda lama. Tang iya belabuh baru enda lama pengudah pengujung perang nya. Kena Januari 1947, edisi keterubah Menara Jaga dalam jaku Thailand disalin. Bisi 200 iti salin ke dichelak ngena mesin mimeograph dalam rumah bala pengerintis seberai tasik. Bala menyadi terus ngena chara ti sama kena nyelak majalah nyentukka taun 1952. Maya nya, 500 iti majalah disadung ninting bulan. Ba taun nya, bala menyadi kitai berengkah ngasuh siti bisnes nyelak majalah ke sida. Kena September 1993, pampang opis Jepun berengkah nyelak majalah Menara Jaga enggau Peratika! dalam jaku Thailand lalu dianjung ngagai serata dunya.

Kemayaharitu, kira-kira 80 iku menyadi lelaki enggau indu gawa ba pampang opis Thailand tauka ba RTO kena nulung ba pengawa nyalin. Kelimpah ari jaku Thailand, Menara Jaga mega disalin ngagai jaku Akha, Lahu, Laos enggau jaku Orang Bisu Thailand.

Bisi 5,000 iku penginjil ba endur ke dipegai pampang opis Thailand, lalu semua sida beterima kasih ngagai Jehovah laban bisi majalah Menara Jaga ke disalin ngagai bansa jaku sida empu.—Jaku-Dalam 10:22.