Kena 6 Ogos 2020, siti kot ba menua Turkmenistan ngukum Menyadi Eldor enggau Sanjarbek Saburov dijil pengelama dua taun ketegal enggai nyadi soldadu. Seduai iya diri menyadi; Eldor nya beumur 21 taun lalu Sanjarbek beumur 25 taun. Kot nya udah nulak apil seduai iya. Tu meh kali kedua seduai iya diukum ketegal deka mengkang neutral.

Kena taun 2016, Menyadi Sanjarbek Saburov dikangau nyadi soldadu. Enggau basa, iya madahka diri enggai nyadi soldadu. Iya lalu didawa, sereta diberi sekat dalam timpuh dua taun.

Ba taun siti, madik iya ke biak, Eldor, mega enggai nyadi soldadu maya iya dikangau. Iya mega didawa ba kot, lalu diukum ngereja pengawa ti berat ba kem alai 20 peratus gaji iya diambi perintah menua.

Nitihka undang-undang menua Turkmenistan, indah enti seseiku orang kala diukum laban enggai nyadi soldadu, iya agi ulih diukum baru dudi hari. Kena bulan April 2020, seduai iya bela dikangau ngagai opis kena ngerejister nyadi soldadu. Laban seduai iya sama nulak, sida didawa lalu dijil

Apai indai seduai iya tentu tusah ati sereta irau ketegal kedua-dua anak sida dijil. Tang kelimpah ari nya, tu mega mai penanggul besai ba penatai pemisi sida sebilik. Apai seduai iya balat amat merinsa ketegal pemedis ba belakang, lalu ketegal nya, iya enda ulih gawa. Anak iya ke dua iku nya meh ke gawa ba ladang kapas kena melanja sida sebilik. Tang diatu, apai indai nya nadai agi sukung ba belanja, ketegal anak sida udah dijil. Ari ke ditulung, apai indai nya patut nulung anak sida ke dikurung dalam rumah jil.

Ba orang ke enggai nyadi soldadu, nadai peluang ngereja utai bukai nitihka undang-undang menua Turkmenistan. Ketegal tu, bala menyadi lelaki ke agi biak ba Turkmenistan ti enggai nyadi soldadu, ulih diukum jil nyentukka empat taun. Menyadi Eldor enggau Sanjarbek nya dua iku entara sepuluh iku Saksi ke dijil ba Turkmenistan ketegal mengkang neutral.

Kitai andalka Jehovah deka merekatka semua menyadi lelaki ke biak ba Turkmenistan laban sida enggau berani ngetanka pengarap sida. Awakka sida semua ingatka semaya Jehovah ngagai Raja Asa ti madah: “Kita enda tau enda kering, lalu anang lemi semengat. Kita deka nerima upah ke pengawa ti dikereja kita.”—2 Bansa Israel 15:7.