Menyadi Eziz Atabayev udah betan natka diri dijil ba Turkmenistan pengelama dua taun laban iya enggai nyadi soldadu ketegal pengarap iya. Iya dibibaska kena 19 Disember 2020. Dalam sepuluh taun ti udah, 46 iku menyadi lelaki udah dijil ba Turkmenistan ketegal enggai nyadi soldadu.

Cherita menyadi Eziz berengkah kena taun 2016 lebuh iya dikangau nyadi soldadu. Iya nulak pengawa tu laban penemu ati iya nagang iya ari beperang. Kes iya dibai ngagai opis penawa ba nengeri iya. Nyau ka dua taun udah bekau nya, baru meh kes iya dipechara ba kot, lalu kena 18 Disember 2018, kot nya meri ukum jil pengelama dua taun.

Ku Eziz madah: “Sebedau aku dijil, aku berandau enggau menyadi lelaki ke kala dipechara ba kot, sereta sida ke udah kala dijil, lalu aku nanya sida pasal nama utai ke patut dijangka aku. Aku macha mayuh cherita pengidup bala menyadi ari litaricha kitai. Aku mega macha utai ti meransang ari Bup Kudus.”

Kena pagi hari aku deka diperesa ba kot, seiku menyadi lelaki bekunsika ayat Isaiah 30:15 enggau aku, ti madah: ‘Panggaika pengarap kita ba Aku. Nya baru kita deka kering sereta likun.’ Ayat tu seruran nulung aku bepanggai ngagai Jehovah sereta diau jenuh aja. Belematika ayat tu udah nulung aku sepemanjai aku dijil.”

Taja pan pengidup ba rumah jil endang tusah, tang penguji ti pemadu besai ba Eziz nya laban iya diseraraka ari ruang bilik iya. “Dalam rumah jil, aku ngerapatka agi kaul aku enggau menyadi Kristian ke bukai ke sama dijil enggau aku. Sida nyadi pangan ti bendar, lalu sida nulung aku napi ati ti sunyi ketegal lelengauka diri sebilik enggau bala kaban.”

Eziz mega ngambi sebarang peluang nginjil ngagai orang. Ku iya nerangka: “Keterubah iya, sekeda orang jil enggai ninga lebuh aku berengkah bejaku pasal pengarap aku. Tang nyau ke lama, sida ke nyakal aku deka ningaka aku. Lebuh bisi orang baru tama jil, ke empai ngelala aku, sida pan enggai ningaka aku lebuh aku deka nginjil ngagai sida. Tang sida ke lama dijil, ke udah ningaka pesan aku, ngetanka aku. Indah sida empu bekunsika utai ke dipelajar sida ari aku ngagai sida ke baru tama jil.”

Eziz meri pesan ngagai kitai ngambika ulih napi penguji dudi hari: “Aku meransang semua orang belajarka Bup Kudus enggau dalam, sereta besampi ngagai Jehovah ari ati. Nuan enda tau enda mantaika semua asai ati nuan ngagai Iya, nyengkaum utai ke dikenakutka nuan. Padahka semua utai ngagai Jehovah.”

“Enggau tulung ari Jehovah, aku udah mujur napi penguji tu. Aku andalka Jehovah endang amat deka nulung aku baru dudi hari. Aku enda takutka penguji ti deka datai.”—Masmur 118:6.