Kena 19 Januari 2021, Menyadi Veniamin Gendjiyev diberi ukum jil pengelama dua taun ba Turkmenistan. Tu ketegal iya enggai nyadi soldadu.

Veniamin Gendjiyev

• Ada: 2000 (Seydi)

• Biograpi: Iya dibesaika ba ruang bilik Saksi-Saksi Jehovah. Lebuh iya beumur 15 taun iya nyadi penginjil ke bedau dibaptisa. Iya lalu dibaptisa maya umur iya 19 taun. Orang ke ngelala iya madahka iya orang ke nelap sereta nyamai enggau berandau

  Iya udah dilatih nyadi mekanik. Iya rindu nebah gita. Iya dikeleseka bala serambau ba sekula ketegal pengarap iya. Ari tu, iya belajarka chara ngetanka pengarap diri

Kena Julai 2018, Veniamin dijil pengelama satu taun ketegal enggai nyadi soldadu. Iya dilepaska kena 25 Jun 2019.

Kena 25 Disember 2020 iya dikangau baru ngagai opis penawa ba Begian Dyanev. Bala ari piak ti bekuasa ngasuh iya nuliska kebuah iya nulak pengawa soldadu lebuh iya dikangau. Kena 30 Disember 2020, opis penawa madahka iya deka dipechara baru ba siti kes jenayah. Sida mega ngerampas pasport iya.

Lebuh iya ngenang pasal kali keterubah iya dijil, Veniamin madah: “Aku amat ngasaika sukung ari Jehovah. Nya meri aku pengering kena aku betan napi penguji nya. Aku seruran besampi sereta nusui Berita Manah ngagai orang tangkap ke bukai. Nya nulung aku lebuh aku berasai lemi semengat.”

“Lebuh aku dijil, apai indai aku ngirum salam pengerindu ari sida ke enda ulih ngabas aku. Sukung ari sida meh ke nulung aku betan nyentukka aku dilepaska.”

Siti ayat ke ngeringka Veniamin iya nya Isaiah 54:17. Dia madah, “Nadai senyata ti digaga ulih ngemediska nuan.” Ayat ti meransang baka tu, sereta sampi ari semua kitai, deka nulung iya betan napi penguji tu baru.