David Petrosov beumur 19 taun. Iya diau ba Turkmenistan. Taja pan iya agi biak, pengarap iya udah diuji enggau balat. Iya udah dijil pengelama setaun ketegal enggai nyadi soldadu. Iya baru udah dilepaska kena 30 September, 2020.

Menyadi David Petrosov madah: “Iya ke amat, bisi maya lebuh aku dijil, aku berasai amat tusah ati. Tang Jehovah ngelantangka ati aku nengah jaku Iya. Lebuh aku ingatka Jehovah nemu asai ati aku, lalu Iya besedia deka merindang ati aku, nya meransang aku besampi ngagai Iya. Bisi beberapa ayat Bup Kudus ti nulung aku dalam sesiti pekara, tang ayat ti suah dikenang aku iya nya Pilipi 4:13.”

Menyadi David ada ba Ashgabat, indu nengeri Turkmenistan. Lebuh iya mansang besai, iya majak landik nebah gita. Diatu, iya rindu ngaga lagu iya empu, sereta ngaga pengawa ba luar rumah baka main bul, sukan niki bukit sereta nyemerai ba danau ke semak endur iya diau.

Lebuh agi ba sekula, David belajarka Bup Kudus enggau seiku kaban ke sama sekula ti nyadi Saksi. Iya lalu dibaptisa kena taun 2019. Taja pan nadai seiku pan ari sida David sebilik nyadi Saksi, tang sida bebasaka pengarap iya sereta utai ke dipechaya iya pasal Petara.

Enda lama pengudah iya dibaptisa, David dipechara ba kot ketegal iya enggai nyadi soldadu lebuh dikangau. Ba menua Turkmenistan, nadai pilih ke bukai ke orang ke enggai nyadi soldadu. Nya alai, piak bekuasa ngukum iya dijil pengelama setaun.

Sekumbang iya dijil, Jehovah meri peransang ke diguna menyadi David. Ku iya ngenang: “Lebuh aku ditan, indai aku ngirum salam ari bala menyadi ke enda dikemendarka ngabas aku. Sida seruran nanya berita aku. Iya mega madahka aku pasal sida ke enda ngetu-ngetu besampi ke aku. Tu amat ngagaka ati aku.”

David nemu, nitihka undang-undang menua Turkmenistan, iya engka deka dikangau nyadi soldadu baru ila. Enti pia, iya nyangka deka dipechara baru lalu diberi ukum jil ti panjai agi.

Ku David nerangka: “Baka semua orang, aku pan enggai dijil baru. Tang aku enda takut. Aku bulih pengering ari pengarap aku ngagai Jehovah, ari bala menyadi aku sereta lagu pasal Perintah Petara.”

Kitai andalka Jehovah deka terus meri pemerani enggau penegap pengarap ngagai David. Kitai mega terus besampi ke sida sepuluh iku menyadi lelaki bukai ke agi dijil ba Turkmenistan ketegal enggai nyadi soldadu. Kitai nemu Jehovah endang sayauka sida, ingatka sida sereta nyukung sida.—Masmur 69:33.