Kena 12 November 2019, Menyadi Serdar Dovletov ke beumur 26 taun, dijil pengelama tiga taun ketegal enggai nyadi soldadu ba Turkmen. Sebedau tu, bisi semilan iku menyadi lelaki ke bukai mega dijil ketegal sida enggai nyadi soldadu. Nya alai, bisi tujuh iku menyadi dituduh besalah kena taun 2019, lalu tiga iku da agi kena taun 2018. Pengelama sida dijil mega enda sebaka, berengkah ari setaun nyentukka empat taun.

Menyadi Dovletov datai ari menua Baýramaly, begian Mary, sepiak tenggara Turkmen. Bini iya Surya enggau indai iya Sonya, mega Saksi-Saksi Jehovah.

Kes Menyadi Dovletov berengkah diapil kena 11 November 2019. Ba kes tu dipechara, iya madahka diri enggai nyadi soldadu ketegal penetap ati iya ngagai pengarap ke dipegai iya. Pengawa soldadu nya enda bepelasarka pengarap iya. Nambahka nya, tiga iku lutur mega madahka Menyadi Dovletov ngembuan penyakit usus ti balat. Nya kebuah, iya ke bendar, iya ulih enda enggau pengawa soldadu tu.

Taja pia, hakim ngumbai Menyadi Dovletov besalah, laban iya dituduh sengaja enggai nyadi soldadu. Ketegal tu, Menyadi Dovletov dijil. Enda lama agi, Menyadi Dovletov deka dipindahka begulai enggau semilan iku da agi menyadi lelaki ke bukai, iya nya ba kem kereja kasar Seydi, ba Daerah Lebap. Sida mega deka ngapil kes diri.

Bala menyadi lelaki kitai ke ba Turkmen majak nerima penyakal ti enda lurus. Kitai deka besampika sida, ngambi sida ulih mengkang tetap ati sereta betan. Kitai amat andal, Jehovah deka nyukung sida, baka ke disemayaka Iya dalam Bup Kudus.—Masmur 37:18, 24.