Kena 18 Januari 2021, Menyadi Maksat Jumadurdyyev dikumbai besalah ba kot di Turkmenistan. Iya deka dijil pengelama dua taun ketegal iya enggai nyadi soldadu.

Maksat Jumadurdyyev

• Ada: 2000 (Seydi, Begian Lebap)

• Biograpi: Iya bisi dua iku menyadi indu. Lebuh besekula, iya murid ti amat manah. Iya rindu main sukan. Iya landik ngelukis enggau ngechat. Iya dikelala orang ba komuniti laban iya orang ti baruh ati, lurus ati sereta bagas gawa

  Kena taun 2018 iya berengkah belajarka Bup Kudus. Iya dibaptisa kena taun 2019. Iya meh seiku aja entara sida sebilik ke nyadi Saksi Jehovah

Menyadi Maksat Jumadurdyyev udah kala dijil pengelama satu taun ketegal enggai nyadi soldadu. Iya dilepaska kena 17 Julai 2019. Taja pia, ba Turkmenistan, enti seseiku orang nulak lebuh dikangau nyadi soldadu, iya ulih dipechara lalu diukum dua kali. Nyadi, lebuh iya dikangau nyadi soldadu kali kedua kena bulan Mac 2020, iya sekali agi nulis surat kena madahka diri enggai nyadi soldadu taja pan iya endang udah nyangka diri deka dijil baru.

Pengudah dikangau, bisi beberapa kali Maksat ditasat sereta diperesa lutur. Udah nya, kena 30 Disember 2020, piak ti bekuasa madahka Maksat iya dituduh ngereja pengawa jenayah. Sida mega ngerampas passport ari iya.

Iya napi mayuh macham penusah lebuh iya ke terubah iya dijil. Maksat madah: “Lebuh aku dijil kena taun 2018, utai ti pemadu pedis ditapi aku iya nya diserara ari diri sebilik. . . . Ketegal apai indai aku ukai Saksi-Saksi Jehovah, seduai iya madah enti aku milih jalai pengidup tu, sida enggai nyukung aku.”

Maksat ngenang: “Jaku ba Mark 10:29, 30 nulung aku betan napi ati ti sunyi ketegal diserara ari diri sebilik enggau bala kaban. Jesus madah, enti kitai ngelengkaka utai ketegal deka nitihka Jesus tauka ketegal Berita Manah, kitai deka nerima seratus kali lipat mayuh agi ari utai ke udah dilenyauka kitai.”

Sekumbang iya dijil, Maksat suah ngasaika Jehovah nyaut sampi iya enggau jampat ngambika iya dijaga ari penusah. Iya suah ingatka ayat ba Josua 1:9 ti madah: ‘Anang takut tauka lemi semengat, laban Aku, Jehovah Petara nuan bisi enggau nuan di sebarang endur nuan bejalai.’

Sebedau iya dipechara kali kedua, Maksat madahka diri keran deka idup sejalai enggau penemu ati iya ti udah dilatih nengah Bup Kudus. Ku iya: “Indah enti aku dijil kali kedua, aku andalka Jehovah deka nulung aku enda ngira nama nyadi ngagai aku. Jaku lalau ari Pilipi 4:6 7 nulung aku nyadi berani sereta enda kelalu irau.”

Kitai terus besampi ke menyadi kitai Maksat, enggau semua menyadi lelaki ke biak sereta berani ti keran deka ngayanka diri nyukung hak Jehovah merintah. Kitai andalka Jehovah deka ngupah pengarap ke diayanka bala menyadi kitai ke dijil.—Pemandang 2:10.