Kena 10 Februari 2021, Menyadi Nazar Alliyev dikumbai besalah ba kot di Turkmenistan lalu diukum jil pengelama satu taun ketegal iya enggai nyadi soldadu.

Nazar Alliyev

• Ada: 2000 (Begian Lebap)

• Biograpi: Iya diau ba Turkmenabat enggau indai sereta dua iku menyadi iya. Iya rindu main bul enggau volleyball. Iya napi dua bengkah penyakit jantung. Kena melanja diri sebilik iya gawa ba kedai nguntin buk

  Iya belajar pasal prinsip Bup Kudus ari indai iya, lalu rinduka utai ke dipelajar. Lebuh iya beumur 14 taun, iya dibaptisa kena taun 2015. Orang ke ngelala iya madahka iya seiku nembiak ti gaga ati, gerah jari sereta baruh ati. Ruang bilik iya gaga ati nyukung pemutus iya

Kena 16 Mei 2020, Menyadi Nazar Alliyev ditaban ngagai opis ngerejista soldadu. Bala pegawai ngansak iya ngerasukka baju soldadu, laban enti iya ngereja nya, tu nunjukka iya udah setuju nyadi soldadu. Tang iya nulak. Kena 28 Mei iya betemu baru enggau bala pegawai lalu sekali agi iya enggai diasuh nyadi soldadu. Kena bulan Jun iya nuliska surat ngagai opis ngerejista soldadu ke ngemataka pelilih menua nya kena iya nerangka pasal pengarap diri.

Kena 4 Januari 2021, Nazar enggau indai iya ngagai opis penawa ba pelilih Khojambaz. Nazar nerangka kebuah iya engai nyadi soldadu, lalu madahka diri sanggup ngereja pengawa bukai ari ke dilatih nyadi soldadu. Taja pia, penawa nya madahka Nazar, iya deka dituduh dalam siti kes jenayah.

Diatu, Nazar udah beumur 20 taun. Ku iya madah: “Lebuh nuan bepanggai ba Jehovah lebuh napi penguji baka tu, iya meri nuan pemaik dalam ati. Enggau saup Jehovah, nuan ulih bejaku enggau nelap.”

Iya nampung: “Lebuh aku ngenangka utai ke udah nyadi, aku nemu Jehovah endang seruran nyukung aku. Tu ngasuh aku andal, Iya deka terus nulung aku dudi hari.”

Ba menua Turkmenistan, orang ke nulak lebuh dikangau nyadi soldadu, enda ulih minta ngereja pengawa bukai kelimpah ari nyadi soldadu. Ketegal tu, bala menyadi lelaki ke biak ba menua nya ti enggai nyadi soldadu suah dijil nyentukka dua taun. Ke diatu, bisi 15 iku menyadi lelaki ke biak dijil ba Turkmenistan laban sida deka mengkang neutral.

Kitai pechaya Jehovah deka terus “tetap ati” ngagai Nazar enggau sida menyadi lelaki ti bukai ke dijil ba Turkmenistan.—Masmur 18:25.