Kena 16 Mac 2021, Menyadi Rasul Rozbayev ari menua Turkmenistan dikumbai kot besalah. Iya diukum jil pengelama dua taun ketegal enggai nyadi soldadu. Tu meh kali kedua iya diukum laban deka mengkang neutral.

Rasul Rozbayev

• Ada: 1999 (Khallang)

• Biograpi: Iya bisi dua iku kaka enggau seiku madi lelaki. Pengudah tembu belajar sekula menengah, iya lalu dilatih nyadi tukang guntin buk. Iya rindu main bul, volleyball sereta nyemerai

  Lebuh iya agi mit, apai indai iya nyadi Saksi-Saksi Jehovah. Iya empu dibaptisa kena taun 2013

Menyadi Rasul Rozbayev keterubah iya dikumbai besalah laban enggai nyadi soldadu kena 19 Disember 2017. Ukum ke diberi iya nya, iya diasuh ngereja pengawa berat pengelama dua taun ti dikumbai piak ti bekuasa ulih “ngemetulka” runding iya. Iya diasuh nyaga siti umai, nanam gandum dia, lalu lebuh nya diketau iya patut meri 20 peratus ari asil tanah nya ngagai perintah menua. Tanah alai iya diasuh gawa nya amat jauh ari rumah iya. Ketegal iya nadai perengka pengangkut, iya patut bedarat kin.

Nitihka undang-undang menua Turkmenistan, orang ke enggai nyadi soldadu ketegal pengarap iya tau diukum nyentukka dua kali. Nya alai, kena 22 April 2020 iya dikangau baru ngagai opis ngerejista soldadu lalu dia iya sekali agi madahka diri enggai nyadi soldadu. Dalam bebulan udah bekau nya, iya suah dikangau ke opis soldadu, ditasat, diperesa lutur sereta diemba sida ke madahka iya deka diukum tauka dijil. Kena 22 Januari 2021, kes iya dibai ngagai piak ti bedawa.

Teladan bala menyadi ke napi penguji ti sama mayuh meransang Rasul. Ku iya: “Teladan sida nulung aku bepanggai ngagai Jehovah . . . sereta ngeringka aku lebuh diperinsa. Enti aku ulih mengkang tetap ati, aku pan deka ngelantangka ati Jehovah enggau Jesus.” Tang penguji tu pan diasaika sida Rasul sebilik mega. Indai iya nerangka nama utai ke nulung iya mengkang kering maya tu: “Ari cherita Bup Kudus enggau video ba jw.org, aku ulih nemu, ukai aku seiku aja ke napi penguji tu. Bisi menyadi bukai ke sama napi tu, lalu sida sigi udah menang. Teladan sida meri aku pengering ngambika ulih betan.”

Ayat ba Masmur 37:23, 24 udah ngelantangka ati Rasul. Kitai nemu, ari saup Jehovah, semua bala menyadi kitai ke biak sereta berani deka mengkang tegap ba pengarap, taluk ngagai Petara enggau seruran gaga ati.