Enda lama da agi a kot soldadu ba Turkmenistan deka madahka jaku gerah pasal kes Menyadi Ruslan Artykmyradov. Iya engka deka dijil pengelama dua taun laban iya enggai nyadi soldadu ketegal pengarap iya. Iya udah ditan kenyau ari 15 Disember 2020. Tu meh kali kedua iya dipechara ba kot lalu engka dijil ketegal pengarap iya.

Ruslan Artykmyradov

• Ada: 2000 (kampung Alpan Gengeshlik)

• Biograpi: Iya dibesaika ba endur ke jauh ari bandar besai. Iya gawa ba kedai mekanik. Iya ransing belajar ba sekula sereta rindu main bul

  Iya belajar pasal Bup Kudus ari indai iya. Lebuh meda pengerindu enggau penyerakup ke diayanka bala Saksi-Saksi Jehovah, ati iya ditegu lalu iya mutus deka dibaptisa lebuh iya beumur 15 taun. Ketegal iya rinduka Petara Jehovah, iya enggai nyadi soldadu

Kena 13 Ogos 2018, lebuh Menyadi Ruslan Artykmyradov beumur 18 taun, iya dijil pengelama satu taun ketegal enggai nyadi soldadu. Iya dilepaska kena 12 Ogos 2019 pengudah timpuh ukum iya udah tembu.

Nitihka undang-undang ba Turkmenistan, orang lelaki ke biak ke nulak pengawa soldadu ulih dukum jil dua kali. Nya alai, kena November 2020, Ruslan dikangau baru.

Sekali da agi Ruslan nulak, taja pan iya nemu tu engka ngujungka iya deka dijil kedua kali. Iya ditangkap kena 15 Disember 2020 lalu ditan ba jil nyentukka kes iya dipechara ba kot.

Ruslan keran deka mengkang taluk ngagai Jehovah. Iya ngenang pasal kali keterubah iya dipechara ba kot, “Aku enda takut, taja pan aku nemu diri deka napi utai ti enda lurus ba kot. Tang aku enggai ngelengkaka pengaga ati sereta kaul aku enggau Jehovah.”

Utai ke ditapi Ruslan ba rumah jil sigi enda senang. Gaya pengidup ba rumah jil di menua nya amat enda manah, lalu ke suah iya, Ruslan enda diintu enggau manah. Tang iya seruran beratika saup ari Jehovah. Iya ngenang: “Lebuh aku dijil, aku seruran meda chara Jehovah nulung aku. Ambika chunto, aku ngasaika tulung Jehovah lebuh aku dipalu. Palu keterubah endang ngemedis, tang pengudah nya aku enda ngasaika pemedis nya agi.” Kelimpah ari nya, iya dikeringka bala menyadi ti nyukung iya sereta ngayanka pengerindu. Pemanah sida pan meri saksi ngagai orang bukai ke meda.

Taja pan Ruslan engka dijil baru, tang iya mengkang andalka Jehovah deka nulung iya. Ku iya nerangka: “Aku amat arapka tulung ari Jehovah. . . . Seagi bisi pengadang, dia pan bisi pengaga, lalu seraya pengaga bisi, tu meri pengering enggau pengeliat ati. Lalu orang ke kering enda ulih dialahka.”

Kitai amat beterima kasih ngagai Ruslan enggau nembiak bukai ke berani, ti netapka teladan ti manah. Ari chunto sida, kitai ulih nemu Jehovah deka nulung kitai napi sebarang penguji enggau ati ti gaga sereta berani. Petara tentu deka ngupah penetap ati sida ngagai Perintah Iya.—Hebrew 11:6.