Pengudah dilepaska ari rumah jil kena 3 Oktober 2020, Menyadi Selim Taganov madahka: “Lebuh aku besampi ngagai Jehovah, Iya ngasuh aku tendur agi ari pengirau.” Umur Selim semina 19 taun aja, tang iya udah dijil pengelama setaun laban iya enggai nyadi soldadu ketegal pengarap iya.

Selim ada ba Ashbagat, indu nengeri ba menua Turkmenistan. Lebuh agi biak, iya bagas belajar ba sekula sereta rinduka musik. Iya ngaga lagu, sereta rindu belagu enggau nebah gitar. Apai indai iya, dua iku menyadi lelaki iya, enggau bala kaban madahka iya nya orang ke nelap, manah ati sereta gaga ati. Sebedau ukum iya diberi ba kot, luyar iya (ke dipilih kot empu) madahka: “Tu seiku nembiak ti menyana sereta lurus ati. Iya enda nginsap tauka pengirup. Lalu nambahka nya, iya baru abis sekula menengah. Enti iya dijil, nya ulih ngachau pengidup iya jemah ila.”

Pengidup ba rumah jil sigi tusah. Taja pia, Selim nerangka: “Sekumbang aku dijil, kaul aku enggau Jehovah majak tegap. Aku ingatka pemendar ke dipelajar aku ari Bup Kudus lebuh agi diau ba rumah, lalu aku berengkah meretika ayat nya enggau terang-seterang. Lebuh aku belematika ayat baka Isaiah 41:10, 11, nya amat meransang aku.”

“Lebuh aku ditan nyentukka kes aku dipechara lalu aku dijil, utai ke tusah ditapi aku iya nya, nadai orang alai aku berandau sereta mansutka asai ati diri. Tang aku besampi ngagai Jehovah minta tulung. Pengudah nya, orang jil enggau jejaga jil ke kala ngemba aku sereta kasar enggau aku, berengkah nyukung, indah meransang aku. Tu ngasuh aku andal, Jehovah endang amat nyukung aku.”

Selim mega bulih pengering ari bala menyadi ke diau semak endur iya dijil. Iya ngenang: “Lebuh aku ditan ba jil, mayuh menyadi ngirum salam pengerindu sereta bekunsika utai ti meransang. Aku nguji ingatka semua jaku sida, lalu nandu nya dalam untak aku. Nya merindang sereta ngelantangka ati aku.”

Nitihka undang-undang menua Turkmenistan, Selim nyangka ulih dikangau baru nyadi soldadu. Enti sema tu nyadi dudi hari, Selim nemu diri engka deka diberi ukum jil ti panjai agi. Tang iya madah, “Pengudah aku mujur napi penguji tu enggau saup ari Jehovah, aku enda takutka sebarang penguji ti deka datai dudi hari. Jehovah nyukung aku, lalu tu ngasuh aku andal agi ke Iya sereta berani agi.”

Semua kitai deka ngasaika penguji jemah ila. Selim meransang semua kitai munyi tu: “Enti nuan napi penguji ti sebaka enggau aku, kingatka meh Isaiah 30:15 ti madah: ‘Panggaika pengarap kita ba [Jehovah]. Nya baru kita deka kering sereta likun.’”