Saksi-Saksi Jehovah ba Tetiiv, Ukraine udah dikemendarka begempuru ba Palan Gempuru sida pengudah empat taun ngapil kes tu ba kot. Iya ke bendar, Palan Gempuru sida udah tembu didirika kena Disember 2014. Tang State Architect-Building Council (SABC) majak nagang sida ngena endur nya. Udah enam kali bala Saksi minta pemendar ngambika bengunan nya ulih dikena, tang peminta nya ditulak sida. Indah sida diasuh mayar penyampau ukum ti amat tinggi. Indah, SABC sempat nginsil pemendar deka nirika bengunan dia, taja pan Palan Gempuru nya udah tembu didirika.

Kena 10 Oktober 2018, Kot Besai Ukraine madahka bala menyadi kitai udah nitihka atur ti ditetapka. Kot mega nerangka enggau nyemetak hak kitai nirika endur begempuru di baruh atur Kot Eropah ke Bekaul enggau Hak Mensia. Kena 28 Mac 2019, tuai SABC ke baru meri pemendar ngagai bala menyadi kitai nirika Palan Gempuru sida. Ba ujung bulan nya mega, Palan nya dikena sida begempuru.

Ba 2 November 2019, bala menyadi ba dia ngaga rumah tebuka. Bala pekereja perintah sereta orang ke semak dia dikangauka datai ngagai Palan Gempuru. Anatoliy Fedorovych Zavalniuk, Tuai ba Opis Administration Menua madahka, “Kita udah nitihka semua atur ke dikemendarka. Palan gempuru kita ngasuh endur ditu manah agi. Aku amat beterima kasih ngagai kita.”

Kitai tentu sama gaga ati enggau bala menyadi kitai ba Tetiiv. Diatu sida ulih ngena Palan Gempuru kena muji sereta ngemuliaka Jehovah.—Masmur 69:30.