Kena 12 November 2020, European Court of Human Rights (ECHR) ngaga pemutus ti nyukung menyadi kitai dalam tiga iti kes pasal Saksi-Saksi Jehovah di Ukraine. Tiga iti kes tu dikumbai Zagubnya enggau Tabachkova vs Ukraine, Migoryanu and Others vs Ukraine, sereta Kornilova vs Ukraine. Ketiga-tiga kes tu dibai ngagai kot ECHR entara taun 2014 enggau 2015. Ba tiap iti kes nya, piak polis nadai meri ukum tauka disiplin ngagai orang ke nyerang Saksi-Saksi Jehovah enggau chara ti mangah. ECHR nya madahka, piak bekuasa ba Ukraine besalah laban enda nyaga hak bala menyadi kitai, lalu ngasuh menua Ukraine mayar ganti rugi ngagai bala mansa enggau penyampau 14,700 euros ($17,400 U.S. tauka RM 71,330) kena nutup pengerugi enggau pemedis ke ditapi sida.

Zagubnya and Tabachkova vs Ukraine: Kena 20 April 2020, dua iku menyadi indu, iya nya Menyadi Tetiana Zagubnya enggau Menyadi Maria Tabachkova, nginjil ari rumah ke rumah ba kampung Novi Mlyny. Seiku paderi ari Gerija Trinity Orthodox ke benama Mykola Lysenko tetemuka seduai iya ba jalai. Iya lalu nyamah seduai iya, malu sida ba pala enggau belakang ngena batang kayu. Taja pan paderi nya ngaku tuju iya deka “ngemba” indah “ngetuka pengawa” sida, tang iya nadai kala dipechara tauka diukum.

Migoryanu and Others vs Ukraine: Kena 5 April 2012, 21 iku Saksi-Saksi Jehovah enggau sekeda orang bukai begempuru kena ngintu Pengawa Ngingatka Pemati Jesus. Mr. Greku, seiku paderi ari Gerija Orthodox, nguluka seraban orang ngagai endur sida begempuru kena ngachau pengawa sida. Raban orang nya nyerauh, ngena jaku kasar sereta ngemba bala orang ke datai, nyengkaum anak mit enggau orang indu ke tuai.

Pengudah nya, paderi nya enggau bala iya terus nyerang Saksi-Saksi Jehovah. Tu nyengkaum nyamah bala menyadi, nganguska kerita seiku menyadi, sereta nikauka bom ke digaga iya empu ngagai rumah alai sekeda Saksi benung tinduk. Bala mansa ngeriput semua serang tu ngagai piak ti bekuasa, sereta meri bukti ti nunjukka semua tu amat nyadi. Ba sekeda kes, indah bisi video ke nunjukka serang nya benung dipejalaika raban orang nya. Taja pia, piak polis enggai ngaku semua serang tu nyadi ketegal pemenchi ke bepelasarka pengarap. Indah sida madahka, video nya enda terang nunjukka sapa ke ngereja semua pengawa nya. Nadai seiku pan ari paderi tauka bala iya kala diukum.

Kornilova vs Ukraine: Kena 7 Mac 2013, Menyadi indu Tetyana Kornilova enggau Menyadi indu Serdiuk mai orang ke berimbai pendiau sida datai ke Pengawa Ngingatka Pemati Jesus ba kampung Nosivka. Seiku lelaki berengkah nganu sida, nyerauh jaku ti kasar sereta bejaika sida ketegal pengarap sida. Udah nya, iya nyerang sida lalu balat mukut Tetyana ba mua iya nyentukka iya balat bakal lalu tama sepital pengelama 11 hari. Piak polis enggai ngumbai serang tu nyadi ketegal lelaki nya begedika pengarap seduai iya, tang semina laban iya empu begedika menyadi indu nya. Lebuh lelaki nya dipechara ba kot, iya semina diasuh mayar saman ti mimit aja.

Bala menyadi ke ngarika Pampang Opis Ukraine suah baum enggau pengari nengeri enggau pengari menua Ukraine, indah pegawai entarabansa, ngambika berandauka sakal ke ditapi bala Saksi ba menua nya. Tang pengudah nguji semua chara nya tang nadai asil, bala menyadi berengkah ngemai kes tu ngagai ECHR kenyau ari taun 2014. Setaun sebedau nya, bala pemesai udah berengkah ngaga riput pasal penanggul tu ba menua Ukraine. Pemesai ke meresa kes ke diriput orang ba menua Ukraine nulis munyi tu dalam riput iya kena taun 2013: “Ketegal piak polis enda mansik tauka ngukum pengawa jenayah ke nyadi ketegal pemenchi ti bekaul enggau pengarap, penjenayah nya nyau berani agi terus nyerang mansa sida.” Pia mega, United Nations Human Rights Committee ngeluarka siti riput pasal Ukraine ba taun ti sama ti madah, komiti nya amat irau laban kes jenayah ke nyadi ketegal pemenchi ti bepelasarka pengarap, nyengkaum serang ngagai Saksi-Saksi Jehovah, suah dipechara ba kot Ukraine sama baka kes jenayah ti dikumbai hal mit. Riput ari komiti nya ngasuh perintah Ukraine “bebendar agi mansik kes jenayah ke nyadi ketegal pemenchi ke pengarap, nentuka penjenayah nya dipechara . . . lalu diukum naka ke patut, lalu nentuka sida ke nyadi mansa nerima ganti rugi kena nutup utai ke dilenyau sida tauka pemedis ke diasaika sida.”

Dalam beberapa taun ti udah, perintah Ukraine belabuh ngereja utai kena ngaduka penanggul tu. Taja pan Saksi-Saksi Jehovah ba Ukraine bibas bejalaika sembah sida, tang kitai arapka pemutus ari ECHR tu deka meransang piak ti bekuasa di Ukraine enggau menua bukai terus nyaga hak bala menyadi kitai. “Semua jalai [Jehovah] endang lurus magang,” lalu kitai keran nganti maya Iya deka muai semua pemerinsa ke ditapi bala penyembah Iya.—Ulang Adat 32:4.