Saksi-Saksi Jehovah ba Ukraine ngatur pengawa mandangka Bup Kudus ba endur orang mayuh lebuh ngeluarka New World Translation of the Christian Greek Scriptures dalam Bansa Jaku Bengal Bisu Rusia. Tu amat ngagitka ati. Pengawa mandangka Bup Kudus tu diatur ba Lviv berengkah ari 7 Oktober 2018 nyentukka 7 Jun 2019. Pengawa tu mega bisi diatur ba menua Kharkiv, Kyiv, Odesa, enggau Dnipro.

Sebedau pengawa tu diatur ba tiap iti menua nya, eklisia bansa jaku bengal bisu ba menua nya empu, nyadung video tauka utai chelak ngagai orang ke bengal tauka enda lansik ninga. Sida madahka alai pengawa nya deka diatur. Kelimpah ari nya, Begian Penerang ke Orang Mayuh ba pampang opis Ukraine udah nyadung surat ti dikena mai orang datai ngagai bala pengajar, bala media, sereta pegawai perintah.

Program ti keterubah diatur ba Lviv City Deaf Club. Ba dia orang ulih meda mayuh program elektronik ke ulih dikena orang bengal bisu belajarka Bup Kudus, baka aplikasi JW Library Sign Language^®. Orang ke datai mega ulih meda baka ni gamal Bup Kudus sepemanjai sejarah. Tu berengkah ari gulung surat nyentukka bup kemayaharitu. Ngambika chunto, sida ulih meda gamal asal Bup Kudus ari taun 1927.

Kitai amat gaga ati laban udah bisi New World Translation of the Christian Greek Scriptures dalam Bansa Jaku Bengal Bisu Rusia. Kitai pechaya tu ulih nulung orang ke begunaka Bansa Jaku Bengal Bisu Rusia bulih penemu ti betul pasal Bup Kudus.—Matthew 5:3.