Kena 17 Mac, 2020, Kot Apil Menua England enggau Wales ngetanka pemutus ti udah digaga Kot Tinggi, ti madahka Saksi-Saksi Jehovah bisi hak nitihka atur Bup Kudus ti bekaul enggau muai orang ari gerempung.

Kot Tinggi nya udah mutuska semua eklisia Saksi-Saksi Jehovah bisi hak madahka jaku gerah pasal seseiku orang ke nadai agi seiku ari Saksi Jehovah. Kot nya mega madahka, tuju atur tu ukai kena ngenyaika nama orang nya. Lebuh hakim Richard Spearman meri pemutus iya, ku iya madah: “Sesiti gerempung pengarap ti deka ngasika standard Bup Kudus endang patut ulih muai orang ke bedosa ngelaban standard nya. Nya beguna bendar, laban orang ke enggai idup sejalai enggau prinsip nya, enda layak nyadi sebagi ari gerempung nya agi. Pia mega, enti orang nya enda dibuai ari gerempung, nya ulih meri empas ti enda manah ngagai sida ke bukai dalam pengarap nya.”

Pengudah pemutus tu diberi, orang seiku ke ngepunka kes tu minta Kot Apil meresa kes iya baru. Tang Kot Apil nulak peminta iya lalu madahka “endang nadai kebuah” meresa kes nya baru, laban pemutus Kot Tinggi “endang betul” lalu pia mega “sesiti gerempung pengarap endang bisi hak muai orang ari gerempung nya.”

Shane Brady, seiku luyar ke ngarika Saksi-Saksi Jehovah madahka: “Pemutus nya sejalai enggau pemutus ke udah digaga mayuh kot bukai, nyengkaum kot di menua England, European Court of Human Rights, Kot Apil di menua Kanada, Eropa sereta Amerika Serikat. Pemutus ke digaga semua kot tu ngetanka hak Saksi-Saksi Jehovah mutuska sapa ke ulih nyadi sebagi ari gerempung nya.”

Kitai gaga ati Kot nya ngetanka hak kitai nitihka atur ari Bup Kudus, sereta nyaga eklisia kitai ari orang ke deka ngerusak moral ti menyana.—1 Korint 5:11; 2 John 9-11.